Дар вилояти Хатлон як гурӯҳи муташаккили фаромиллӣ, бо гумони муомилоти қариб 180 кг маводи мухаддир, ки аз Афғонистон қочоқ карда, мехостанд ба хориҷи кишвар баранд, боздошт шудаанд.

Дар ин бора АМИТ “Ховар” бо такя ба Кумитаи давлатии амнияти миллии Тоҷикистон (КДАМ) хабар дода, навиштааст, ки аъзои ин гурӯҳ аз 4 шаҳрвандони Тоҷикистон ва 1 шаҳрванди Афғонистон иборат буданд.

Манбаъ менависад, ки вазни умумии маводи мухаддири дарёфтшуда 178 килограмму 845 грамм, аз ҷумла, 148 килограмму 129 грамм ҳашиш ва 30 килограмму 333 грамм афюнро ташкил дода, дар дидбонгоҳи сарҳадии “Панҷоб”-и ноҳияи Ҳамадонӣ, ҳаммарз бо Афғонистон мусодира карда шуд.

Ба иттилои КДАМ, қисми зиёди маводи мухаддир, яъне 139 бастаи маводи нашъаовар аз мошини Бобоҷони Абдулҳақ, шаҳрванди 34-солаи Тоҷикистон дарёфт шудааст, Илова бар ин, дар ҳамон минтақа (дидбонгоҳи сарҳадии “Панҷоб”) 41 бастаи дигари маводи мухаддир ёфт шудааст.

“Дар рафти бозпурсии Бобоҷони Абдулҳақ муайян карда шуд, ки номбурда ин миқдор маводи мухаддирро аз қочоқбарои афғон ба маблағи 20 000 доллари амрикоӣ дастрас намуда, мақсад доштааст тавассути ҳаммаслакони ҷиноятии худ онро ба шаҳри Душанбе, вилояти Суғд ва баъдан ба хориҷи кишвар интиқол диҳад”,-омадааст дар хабарнома.
Акс аз "Ховар"

Дар идомаи тафтишот, шарикони Бобоҷони Абдулҳақ - Акбари Ҳиҷрат Акбар, шаҳрванди Афғонистон ва Қосимзода Сафаралӣ Раҳмоналӣ, Иброҳимов Раҳмоналӣ Сайдалиевич ва Назиров Диловар Сулаймонович – се шаҳрванди Тоҷикистон дар Душанбе ва Хуҷанд боздошт шуданд.

Муайян шудааст, ки Қосимзода Сафаралӣ 20 ҳазор долларро ба Акбари Ҳиҷрат Акбар барои интиқол ба қочоқбарони афғонистонӣ додааст.

Маълум нест, ки онҳо кай боздлошт шуданд. Ҳамчунин, назари наздикону пайвандон ва худи боздоштшудаҳо дастрас нест.

Бояд гуфт, ин бори аввал нест, ки мақомот аз боздошти гурӯҳҳои нашъалоб хабар медиҳад. Мақомоти Тоҷикистон мегӯянд, маводи мухаддир аксаран аз Афғонистон ба Тоҷикистон, ки марзи дарозтарин дорад, қочоқ мешавад.

Ёдовар мешавем, ки дар соли 2024, аз ҷониби тамоми сохторҳои қудратии Тоҷикистон беш аз 4,3 тонна маводи мухаддир мусодира шуд, ки ин нисбат ба соли 2023 17% ё тақрибан 901,5 кг камтар мебошад.

Инчунин соли гузашта дар Тоҷикистон 839 ҷинояти марбут ба маводи мухаддир сабт шудааст, ки ин нисбат ба соли 2023-юм 140 ҳолат ё 20% афзудааст.

Дар Telegram, Facebook ва Instagram бо мо бимонед.