Додситонии кулли Тоҷикистон мегӯяд, ду зани тоҷик барои бурдани растании ҳазориспанд ба Русия боздошт ва алайҳашон парвандаи ҷиноятӣ боз шудааст. Додгоҳи Русия яке аз ин занҳоро ба муҳлати 8 сол ба зиндон маҳкум кардааст.

Ин ниҳод бо нашри як иттилоия гуфт, ки занҳо ин гиёҳро “бо мақсади шахсӣ ва тиббӣ ба Русия бурдаанд, ки дар фурудгоҳҳои ин кишвар дастгир ва ба ҷавобгарӣ кашида шудаанд”.

Ба иттилои додситонӣ, нисбати яке ин занон бо иттиҳоми нигоҳдорӣ, интиқол, истеҳсол ва коркард бидуни ҳадафи фурӯши маводи мухаддир (моддаи 228, қисми 2) ва ҳаракати ғайриқонунӣ, тавассути сарҳади гумрукии Русия гузаронидани растаниҳои дорои маводи мухаддир (моддаи 229 иловаи 1, қисми 3 Кодекси ҷиноятии Русия) паврандаи ҷиноятӣ боз шудааст.

“Пас аз ба итмом расонидани тафтишот парвандаи ҷиноятӣ ба суд ирсол ва охирон бо ҳукми суди Федератсияи Русия ба ҷазои маҳрумӣ аз озодӣ ба муҳлати 8 сол маҳкум гардидааст”,-навиштааст Додситонии кул.

Ин ниҳод дар бораи тақдири дуюм зани боздоштшуда иттилоъ надодааст. Ҳамин тавр маълум нест, назари ин ду зани тоҷик ва пайвандони онҳо дар робита ба ин қазиячӣ аст.

Додситонии кул ба шаҳрвандони кишвар ҳушдор додааст, ки аз бурдани ҳазориспанд ба Русия ва истифодаи он дар ҳудуди ин кишвар худдорӣ кунанд.  

Ин ниҳод гуфтааст, ки дар сурати аз 10 адад зиёд бурдани “ҳазориспанд”  интиқолдиҳандаро 1 миллион рубли русӣ ҷарима ва ё ҳабси абад таҳдид мекунад.

Аз моҳи феврали соли 2024 ҳазориспанд дар қаламрави Русия ба рӯйхати растаниҳои дорои маводи мухаддир ворид шуда, барои гардиши ғайриқонунӣ ва истифодаи он (шахсӣ ва тиббӣ) ҷарима ва ё ҳабс пешбинӣ шудааст.

Қаблан ВКД Тоҷикистон низ ба шаҳрвандони кишвар ҳушдор дода буд, ки аз бурдани ҳазориспанд ба Русия ва истифодаи он дар ҳудуди ин кишвар худдорӣ кунанд.  

Ахиран, намояндагии Вазорати меҳнату муҳоҷирати Тоҷикистон дар Русия ҳам номи 10 растание, ки бурдани онҳо ба Русия манъ аст нашр карда, аз шаҳрвандони кишвар хост, аз бурдан ва истифодаи он дар ҳудуди ин кишвар худдорӣ кунанд.

Инҳо кадом растаниҳоянд ва барои бурдану истифодаи онҳо чӣ ҷазо таъин карда мешавад дар ин пайванд мутолиа кунед. 

Дар Telegram, Facebook ва Instagram бо мо бимонед.