Президенти Тоҷикистон Эмомалӣ Раҳмон дар ҳошияи Ҳамоиши панҷуми Машварати ҳамкорӣ ва тадбирҳои боварӣ дар Осиё рӯзи 13 июн Президенти Ҷумҳурии Демократии Сотсиалистии Шри-Ланка Майтрипала Сирисенаро ба ҳузур пазируфт.

Бино ба иттилои хадамоти матбуоти сарвари давлат, дар мулоқот натиҷаҳои аввалин музокироти сатҳи олӣ миёни ду кишвар, ки соли 2017 сурат гирифта буд ва инчунин масъалаҳои ҳамкории ҷонибҳо дар соҳаҳои гуногун мавриди муҳокима қарор гирифтанд.

Эмомалӣ Раҳмон таъкид дошт, ки дар доираи сиёсати хориҷии кишвар Тоҷикистон ба таҳкими равобити дӯстона бо давлатҳои  минтақаи рушдёбандаи Осиёи Ҷанубӣ, аз ҷумла Шри-Ланка таваҷҷуҳи доимӣ зоҳир менамояд.

Дар ҷараёни мулоқот ҷонибҳо маҷмуъи васеи масъалаҳои ҳамкорӣ дар бахшҳои гидроэнергетика, бофандагӣ, дорусозӣ, коркарди пашму пӯст, таъсиси корхонаҳои муштараки соҳаи истихроҷу коркарди сангҳои қимматбаҳо ва ороишӣ, таҳияи лоиҳаҳои бузурги зерсохтори нақлиёт, рушди соҳаи сайёҳиро баррасӣ карданд.

Таъкид гардид, ки барои рушду тавсеаи муносибатҳои ҳамкорӣ дар бахшҳои барои ҳарду ҷониб судовар, аз ҷумла сиёсат, иқтисоду тиҷорат, ҷоннок кардани фаъолияти Гурӯҳи дӯстии байнипарламентии Тоҷикистон ва Шри-Ланка, Баргузории Бизнес-Форумҳо, таъсиси Шӯрои соҳибкорони Тоҷикистону Шри - Ланка, дастрасии Тоҷикистон ба бандарҳои баҳрӣ, истифодаи долонҳои транзитӣ, мусоидати бештар хоҳад кард.

Ҷонибҳо барои расидан ба ҳадафҳои судманд, таъсиси Комиссияи муштараки байниҳукуматӣ оид ба ҳамкории иқтисодӣ, тиҷоратӣ ва илмию техникӣ, инчунин имзои лоиҳаи Созишномаи ҳамкорӣ дар соҳаи тиҷорату иқтисодро иқдоми саривақтӣ арзёбӣ карданд.

Дар рафти мулоқот ҷонибҳо ҳамчунин дар доираи ҳамкории дуҷониба ва бисёрҷонибаи созмонҳои минтақавию байналмилалӣ масъалаи мубориза бо таҳдиду хатарҳо, аз қабили тақвияти мубориза бо терроризм, экстремизм, ҷиноятҳои муташаккили фаромарзӣ қочоқи маводи мухаддирро муҳокима карданд.