Шӯрои Аврупо, ки аз сарони 28 кишварҳои Иттиҳоди Аврупо иборат аст, санаи 17 июн стратегияи навро оид ба ҳамкорӣ байни Иттиҳоди Аврупо ва кишварҳои Осиёи Марказӣ қабул кард, хабар медиҳад dw.com.

Дар санад вазифаҳо дар минтақаи Осиёи Марказӣ зикр шудааст. Доир ба қабули стратегия оид ба Осиёи Марказӣ муддати қариб як сол машваратҳои васеъ ҷараён доштанд, то ки назари ҳукумат ва ҷомеаи шаҳрвандӣ ба инобат гирифта шавад, хабар додаанд аз Хадамоти робитаҳои хориҷии Аврупо.

Стратегия нав дуюмин стратегия мебошад, ки стратегияи аввали соли 2007 қабулшударо мукаммал месозад.

Тавре дар Хадамоти робитаҳои хориҷии Аврупо шарҳ додаанд, тайи 10-12 соли охир дар минтақаи Осиёи Марказӣ тағйироти зиёд сурат гирифтааст ва зарур аст, ки тарзи муносибати Иттиҳоди Аврупо муҳиму рӯзмарра боқӣ монад.

“Мо ба ҷомеаи кишварҳои Осиёи Марказӣ дар роҳандозии ислоҳоти заруру саривақтӣ, вокуниш ба таҳдидҳои дохиливу хориҷӣ, мутобиқ шудан ба тағйироти ҷаҳони муосир, ҷараёни баргузории ислоҳот кумак кардан мехоҳем”, - хабар додаанд дар Хадамоти робитаҳои хориҷии Аврупо.

Боз як вазифаи муҳими дигари стратегияи Иттиҳоди Аврупо пешбурд ва ҳавасмандсозии амалисозии ислоҳоти иқтисодии ҷараёндошта ва дар маҷмӯъ расидан ба сатҳи некӯаҳволии бештари аҳолӣ мебошад.

Ҳамчунин дар стратегия ба таҷрибаи Иттиҳоди Аврупо дар самти ҳамгиройӣ таваҷҷуҳ зоҳир шудааст, зеро кишварҳои Осиёи Марказӣ дар ҷустуҷӯи шаклҳои нави ҳамкории минтақавӣ буда, бо таҳдиду чолишҳое дучор мешаванд, ки кишварҳои Иттиҳоди Аврупо паси сар кардаанд.

Ғайр аз ин, дар санад сари ҳамкории бештар зичу густарда бо ҷомеаи шаҳрвандии давлатҳои Осиёи Марказӣ сухан меравад. Дар стратегия рушди ҳамкорӣ бо тиҷорати хурду миёна таъкид шудааст, зеро маҳз чунин тиҷорат дар некӯаҳволии мардум дар дурнамои дарозмуҳлат нақши имконпазири муҳим дорад.

Намояндагони Иттиҳоди Аврупо стратегияи навро оид ба ҳамкорӣ байни Иттиҳоди Аврупо ва кишварҳои Осиёи Марказӣ санаи 7 июл дар вохӯрии вазирон дар Бишкек муаррифӣ ва пешниҳод мекунанд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.