Бо розигии Президенти Тоҷикистон ва тибқи қарорҳои Раиси вилояти Суғд Баҳоваддин Турахонзода ва Рустам Каримзода муовинони Раиси вилоят таъин гардиданд.

Бино ба иттилои хадамоти матбуоти раиси вилояти Суғд, нимаи дуюми рӯзи 14 феврал дар толори хурди Мақомоти иҷроияи ҳокимияти давлатии вилоят маросими муаррифии кадрҳои навтаъиншуда доир шуд. Раиси вилоят Раҷаббой Аҳмадзода ба кадрҳои навтаъиншуда дар иҷрои вазифаҳои хизматӣ барору комёбиҳо таманно кард ва ҷиҳати иҷрои саривақтии қарору фармоишҳо, барномаҳои давлатии соҳавӣ ва дигар санадҳо, инчунин таъмини рушди соҳаҳои хоҷагии халқ дар назди муовинони Раиси вилоят вазифагузорӣ намуд.

Баҳоваддин Турахонзода соли 1976 таваллуд шудааст. Миллаташ тоҷик, маълумоташ олӣ. Соли 1999 Донишгоҳи давлатии ҳуқуқ, бизнес ва сиёсати Тоҷикистонро бо ихтисоси ҳуқуқшинос хатм намудааст.

Мавсуф фаъолияти меҳнатиашро соли 1999 ба ҳайси мутахассиси Раёсати адлияи вилояти Суғд оғоз намуда, сипас дар солҳои гуногун дар вазифаҳои машваратчии Раёсати адлияи вилояти Суғд, машваратчии калони Раёсати адлияи вилояти Суғд, муовини сардори Раёсати адлияи вилояти Суғд ва нотариуси давлатии идораи нотариалии давлатии ноҳияи Ҷаббор Расулов кор кардааст.

Аз соли 2013 то 14 феврали соли 2019 дар вазифаи сардори Раёсати адлияи вилояти Суғд фаъолият дошт.

Рустам Каримзода соли 1972 таваллуд шудааст. Миллаташ тоҷик, маълумоташ олӣ. Донишгоҳи аграрии давлатии Молдавияро бо ихтисоси агроном-олим хатм кардааст.

Мавсуф фаъолияти меҳнатиашро соли 1994 дар филиали Институти боғдорию сабзавоткорӣ дар ноҳияи Бобоҷон Ғафуров оғоз бахшида, дар солҳои гуногун ба сифати ходими хурди илмӣ, ходими калони илмӣ, мудири шуъбаи институти мазкур, муовини авали сардори Сарраёсати кишоварзии вилоят, директори Муассисаи давлатии Маркази илми кишоварзӣ дар вилояти Суғд кор кардааст.

Қобили зикр аст, ки муовинони нав ба фаъолияти соҳаҳои мақомоти ҳифзи ҳуқуқ ва бахши кишоварзии вилоят масъул хоҳанд буд. То ин таъинот раиси вилояти Суғд се муовин дошта, акнун шумори онҳо ба панҷ нафар расид.