Дар минтақаи шимоли ҷумҳурӣ афроди номаълум як оилаи бутун, аз ҷумла се нафар ноболиғонро ба қатл расониданд.

Бино ба иттилои Вазорати корҳои дохилии ҷумҳурӣ, ин ҳодиса шаби рӯзи шанбе ба якшанбе дар ноҳияи Бобоҷон Ғафуров ба вуқӯъ пайваста, бо истифода аз силоҳи оташфишони автомат ҷинояткорон Аҳмадхӯҷа Бобоев, ҳамсари ӯ Ҳаётхон Бобоева, фарзандони ноболиғи онҳо – Рухшона Бобоеваи 16-сола ва Суҳробҷон Бобоеваи 15-соларо ба қатл расонидаанд.

«Санҷарбек Бобоев, кӯдаки 6-солаи оиларо ҷинояткорон дар ҳаммом маҳкам намуда, сипас аз сейф маснӯоти тилоӣ ба маблаги 30 ҳазор доллари ИМА-ро ғорат мекунанд ва баъди ин хонаро оташ зада, аз ҷойи ҳодиса ғайб задаанд», - зикр мегардад дар итттилои вазорат.

Гуфта мешавад, ноболиғ Санҷарбек Бобоев низ аз дуди оташ заҳролуд гашта, дар ҳаммомхона ба ҳалокат расидааст.

Ба иттилои манбаъ, дар робита ба ин ҳодиса бо фармони вазири корҳои дохилӣ гурӯҳи тафтишотӣ-оперативӣ таъсис дода шуда, муовини вазири корҳои дохилӣ роҳбари гурӯҳ мебошад. Аз рӯи ин ҳодиса аз ҷониби Прокуратураи вилояти Суғд парвандаи ҷиноӣ оғоз гардида, тафтиш идома дорад.

Тавре ба ОИ «Азия-Плюс» як манбаъ аз мақомоти интизомии вилояти Суғд хабар дод, ин оила ба фурӯши маснӯоти тилоӣ машғул буда, яке аз фарзияи айни замон баррасишаванда ин аст, ки ҷинояткорон ба хотири азхуд кардани амволи кушташудагон ба ин амал даст задаанд.