Зимни амалиёти махсуси кормандони Кумитаи давлатии амнияти миллии ҷумҳурӣ дар қаламрави ноҳияи Ҳамадонӣ алайҳи гурӯҳи ҷиноятпешаи фаромиллӣ муқовимати мусаллаҳона ба вуқӯъ пайваст.

Тавре ба ОИ «Азия-Плюс» аз маркази робита бо ҷомеаи КДАМ ҶТ хабар доданд, аъзои гурӯҳ таҳти роҳбарии шаҳрванди 40-солаи Афғонистон, сокини деҳаи Дарқади вилояти Тахор Довуд валади Ҷумъахон ба кормандони мақомоти амният муқовимати мусаллаҳона нишон додаанд.

«Роҳбари гурӯҳ ба сӯи кормандони амният норинҷаки ҷангӣ партофта, вале бо оташи ҷавобӣ кушта шуд. Ба ҳаммаслакони ӯ муяссар шуд, ки дар қаламрави кишвари ҳамсоя паноҳ баранд», - гуфтанд дар КДАМ.

Зимнан зикр гардид, ки аз ҷойи ҳодиса ду норинҷаки дастии Ф-1 ва 15 кило маводи мухаддир дарёфт шудааст.

Қобили зикр аст, ки шурӯъ аз оғози соли равон кормандони КДАМ Тоҷикистон беш аз 2 тоннаву 232 кило маводи мухаддирро аз муомилоти ғайриқонунӣ мусодира намуданд.