Дар шаҳри Екатеринбурги Русия ду нафар шаҳрванди Тоҷикистон ба гумони даст доштан дар тайёр кардан ва истифодаи пулҳои қалбакӣ боздошт шудаанд.

Бино ба иттилои хадамоти матбуоти Сарраёсати ВКД Русия дар вилояти Свердловск, Шерзод С.-и 25-сола ва Шероз С.-и 28-сола ба шаҳри Истаравшан дар ҳаҷми беш аз 100 ҳазор рубли русӣ бо пулҳои қалбакии 5-ҳазор рублӣ маблағ интиқол додаанд.

Баъди ин онҳо аз як мағозаи хӯрокворӣ маҳсулот харида, он ҷо ҳама боз бо як пули 5-ҳазор рублӣ ҳисобу китоб кардаанд, аммо фурӯшанда-хазинадори ин мағоза ба аслӣ будани ин пул шубҳа бурда, посбонони мағозаро даъват кардааст ва онҳо дар навбати худ ба мақомоти корҳои дохилӣ муроҷиат кардаанд.

Кормандони пулиси ба ҷойи ҳодиса ҳозиршуда онҳоро ба шуъбаи пулис оварда, аз онҳо дар маҷмӯъ боз 21 адад пули 5 ҳазор рубли қалбакиро мусодира кардаанд. Кормандони пулис маълум кардаанд, ки онҳо дар яке аз иншооти сохтмонӣ кор карда, дар хонаи иҷора иқомат доштаанд.

Мақомоти тафтишоти пулис аз рӯи ин ҳодиса мутобиқи моддаи 186, қ. 1-и КҶ Русия – тайёр кардан, нигоҳдорӣ, интиқол ё фурӯши пулҳои қалбакӣ ё коғазҳои қимматнок парвандаи ҷиноӣ боз намуда, мутобиқи ин модда то 8 соли маҳрумият аз озодӣ пешбинӣ шудааст.