Ҳайати Тоҷикистон дар вохӯрии ҳамасолаи коршиносони пулис, ки чанде қабл дар шаҳри Вена ба кор оғоз намуд, ширкат меварзад. Чорабинӣ аз ҷониби Раёсати Швейтсария ва Котиботи САҲА созмон дода мешавад.

Машварати ҳамасолаи коршиносони пулис дар соли 2014 ба масъалаҳои роҳандозии ҳамкории бевоситаи фаромарзӣ миёни ниҳодҳои интизомӣ ва мақомоти судӣ дар кишварҳои узви САҲА бахшида шудааст.

Дар сатҳҳои дуҷонибаву бисёрҷониба ва минтақавӣ намояндагони мақомоти дахлдори кишварҳои узви созмон (мақомоти ҳифзи ҳуқуқ, прокуратура ва суд) дурнамо, технологияҳои пешрафта ва мушкилот дар ин самти ҳамкориро муфассал баррасӣ мекунанд. Дар вохӯрӣ намояндагони 37 кишвару созмонҳои байнулмилалӣ ҳузур доранд.

Ғайр аз ин, коршиносони сохторҳои иҷроияи дахлдори адолати судии ҷиноятии САҲА ва дигар созмонҳои байнулмилалии минтақавӣ аз таҷрибаи пешқадам дар ташкили чунин ҳамкории фарромарзӣ табодули назар хоҳанд кард.