- Андешидани тадбирҳои бесобиқаи амниятӣ дар робита ба маълумоти дар Душанбе баргузор шудани гирдиҳамойии ғайриқонунии зиддиҳукуматӣ ба нафъи паҳнкунандагони овозаҳо аст, - иброз дошт ба «Азия-Плюс» доктори улуми ҳуқуқшиносӣ, муовини раиси Ҳизби сотсиал-демократии Тоҷикистон Шокирҷон Ҳакимов.

Ба андешаи ӯ, сохторҳои сершумори давлатӣ шурӯъ аз дастгоҳи иҷроияи сарвари давлат, ҳукумат, парлумон, Маркази тадқиқоти стратегӣ, мақомоти амният бояд донанд, ки кадом гурӯҳи аҳолӣ метавонад ба даъватҳо ба гирдиҳамойӣ ҷонибдорӣ намояд, рейтинги «Гурӯҳи 24» дар кишвар чӣ гуна аст, кадом гурӯҳи намояндагони ҷомеаи тоҷик метавонанд аз пайи паҳнкунандагони овозаҳо раванд.

«Алҳол ҳукуматдорони кишвар ва сохторҳои қудратӣ комилан наметавонанд интиқод ё эродҳоро қабул намоянд ва овозаҳо дар бораи гирдиҳамойӣ нишон дод, ки дар чунин вазъиятҳо онҳо тадбирҳои дурусту муассир андешида наметавонанд», - гуфт Ҳакимов.

Ҳуқуқшинос зикр кард, ки таҳлилгари оқилу сиёсатмадори дурандеш ба хубӣ медонад, ки дар воқеъияти имрӯзаи Тоҷикистон ҳеҷ кадоме аз аҳзоби сиёсии ба таври қонунӣ амалкунанда ва ҳеҷ яке аз сиёсатмадори ҷиддӣ ба ноамн гаштани вазъ манфиатдор нест ва таваҷҷуҳи созмонҳои бонуфузи байнулмилалӣ, ки хоҳиши дар Тоҷикистон мавқеъи худро пайдо кардан доранд, имрӯз ба рӯйдодҳо дар Шарқи Наздик, Укараина ва Афғонистон мутамарказ шудаанд.

«Агар ҳукуматдорони Тоҷикистон овозаҳо дар бораи баргузории гирдиҳамойии эътирозии ғайриқонунӣ дар Душанберо ҷиддӣ қабул карда бошанд, пас онҳоро мебояд бобати сиёсати роҳандозикардаашон сари андеша раванд», - афзуд номбурда.