Ширкати ҳавопаймоии хусусии Тоҷикистон - “Сомон Эйр” парвозҳояшро бо хатсайри Чин дар моҳи феврал бекор мекунад. Парвозҳои ширкат ба Чин ҳанӯз 24 январ қатъ шуда буданд.

“Дар робита бо эълон шудани ҳолати фавқуллодаи байналмилалӣ аз ҷониби Созмони Умумиҷаҳонии Тандурустӣ дар пайи хуруҷи глобалии сироати коронавирус, ҳамзамон дар асоси дастури Агентии авиатсияи граждании назди ҳукумати Тоҷикистон бо мақсади ҳифзи саломатии аҳолии Тоҷикистон аз сирояти болозикр, ширкати ҳавопаймоии “Сомон Эйр” қарор қабул намуд, ки дар моҳи феврали соли 2020 муваққатан иҷрои хатсайрҳоро дар самти Душанбе-Урумчи-Душанбе қатъ намояд”, - хабар медиҳад дафтари матбуоти ширкат.

Ширкати ҳавопаймоӣ аз мусофирони худ барои эҷоди нороҳатӣ, ки бо сабаби таъмини бехатарӣ ба амал омадааст, маъзарат мепурсад.

Гуфта мешавад, маблағи чиптаи харидаи мусофирони хатсайрҳои қатъшуда баргардонида мешавад.

“Ғайр аз ин, бо хоҳиши мусофирон чиптаи парвоз ба мӯҳлати дигар иваз хоҳад шуд. Маълумоти иловагиро оиди хатсайрҳои қатъшуда метавонед аз маркази маълумотдиҳии ширкати ҳавопаймоӣ бо рақамҳои 44 640 40 49 ва 44 640 40 50 дастрас намоед”, - омадааст дар иттилоияи расмии ширкат.

Хотиррасон мешавад, ки ширкати ҳавопаймоии “Сомон Эйр” бо сабаби ҷашни Соли нав дар Чин аз санаи 24-уми январи соли ҷорӣ парвозҳоро аз Душанбе ба Урумчи ва бозпас муваққатан қатъ карда буд. Хатсайри аввалин дар самти Душанбе-Урумчи баъди ҷашнгирии Соли нав ба санаи 4 феврал ба нақша гирифта шуда буд.

Айни замон ширкати ҳавопаймоии “Сомон Эйр” парвоҳоро аз Тоҷикистон ба Олмон, АМА, Туркию, Ҳиндустон, Чин, Русия, Қазоқистон ва Ӯзбекистон анҷом медиҳад. Парки ширкат аз ҳавопаймоҳои Боинг 737-300, -800, -900 ва чархболи Airbus H125иборат аст.

Ёдрас мекунем, ки дар фурудгоҳи Душанбе дастгоҳҳои ҳароратсанҷ амал карда, табибон бо сарулибоси муҳофизатӣ навбатдорӣ мекунанд. Ҳамчунин дар бунгоҳи тиббии фурудгоҳ капсулаи изолятсионӣ тайёр карда шудааст, ки дар онҳо гирифторони эҳтимолии вирусро ҷо мекунанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.