Дар яке аз қитъаҳои хавфноки роҳи мошингарди Айнӣ - Кӯҳистони Мастчоҳ бо мақсади таъмини бехатарии ҳаракати нақлиёт ва амнияти мусофирон ҳукумати ноҳияи Айнӣ ситоди шабонарӯзӣ ташкил кард. Ин ситод пас аз садамаи автомашиаи боркаш роҳандозӣ шуд.
Тавре ки ҳукумати ноҳияи Айнӣ хабар медиҳад, қитъаи аз 20 то 24-ум километри роҳ хеле ноҳамвор ва душворгузар буда, дар он хавфи фаромадани ярчу сел вуҷуд дорад.
“Ситод бехатарии ҳаракат дар роҳро назорат мекунад, - шарҳ медиҳанд дар ҳукумати ноҳия. - Ба он ҷо техника бурда шуда, дар сурати зарурат барои тозакунии роҳ истифода мешавад”.
Қаблан дар шабакаҳои иҷтимоӣ навори видео нашр шуд, ки дар он як автомашинаи боркаш дар миёнаи дарёи Зарафшон қарор дошта, бо маҷрои об меравад ва ҳарчи бештар ба умқи он меравад.
Ин ҳодиса рӯзи 4 июл дар километри 24-уми роҳи мошингарди Айнӣ - Кӯҳистони Мастчоҳ рух дода, ба иттилои Раёсати Кумитаи ҳолатҳои фавқулодаи ноҳияи Айнӣ, автомашинаи тамғаи Shacman зери идораи ронанда Қурбоналӣ Салимов ангишт мекашонидааст.
Вақте ки автомашина ба дарё сарозер мешавад, ронанда саривақт аз он баромада наметавонад.
Хабарнигори газетаи маҳаллии “Файзи Зарафшон” Наҷибулло Ҳомидҷон дар шабакаҳои иҷтимоӣ хабар дод, ки бар асари болоравии мавсимии об дар дарёи Зарафшон, қитъаи аз 22 то 24-ум километри роҳ байни деҳаҳои Рарз ва Похут ҳамасола вайрон мешавад.
“Роҳ барои автомашинаҳои боркаши бузургҳаҷми “Дулан”, ки шабонарӯзӣ ангишт мекашонанд, пешбинӣ нашуда, пулҳо ба вазни онҳо тобовар нестанд. Бо вуҷуди ин, кашонидани ангишт тариқи ин роҳ идома дорад”, - навиштааст ӯ.
Роҳи мошингарди Айнӣ - Кӯҳистони Мастчоҳ дар тавозуни Вазорати нақлиёт қарор дошта, ба ақидаи рӯзноманигор, бо назардошти аҳаммияти умумидавлатӣ доштани он, ба вазъияти роҳ таваҷҷуҳи бештар мебояд.
Руcский