Қирғизистон марзи худ бо Тоҷикистонро, ки солҳо баҳсбарангез буду имсол пурра ҳал шуд, симхорпеч мекунад. Корҳо дар ин самт аллакай оғоз шуда, ин кишвар азм дорад, то охири соли 2025-ум 420 километри сарҳади худро бо симхор маҳкам кунад.

Дар ин бора хабаргузории “24.kg” бо такя ба хадамоти матбуоти намояндаи ваколатдори президенти ин кишвар дар вилояти Ботканд хабар додааст.

Ба навиштаи манбаъ, корҳо оид ба насби симхорҳо дар сарҳади давлатии Қирғизистону Тоҷикистон дар минтақаи Қошмоло аз ҷамоати деҳоти Торт-Гули Боткенд оғоз шудааст.

“Маросими оғози корҳо дар нуқтаи пайвастшавии сарҳадҳо - сутуни (стелаи) рамзӣ дар нуқтаи пайванди сарҳадҳои давлатии Тоҷикистон, Қирғизистон ва Ӯзбекистон баргузор шуд. Дар ин чорабинӣ Қамчибек Тошиев, раиси Кумитаи давлатии амнияти миллӣ ба таври онлайн иштирок кард”, навиштааст хабаргузорӣ.

Манбаъ гуфтааст, ки “бо мақсади таъмин намудани раванди корҳо дар минтақаи наздимарзӣ, як бошишгоҳи саҳроӣ бунёд карда шуда, техникаи махсус оварда шудааст. Барои зиндагӣ ва хидмати сарбозон тамоми шароити зарурӣ фароҳам оварда шудааст”.

1/3
Ҷониби Тоҷикистон дар бораи оғози корҳои маҳкамкунии сарҳади худ бо Қирғизистон ҳоло хабар надодааст.

Бояд гуфт, ки ба мақомоти Тоҷикистону Қирғизистон баъди тақрибан чор соли нофаҳмиҳо муяссар шуд, ки дар масъалаи сарҳад тавофуқ ҳосил намуда, “ба муносибатҳои неки ҳамсоягӣ” баргарданд.

Бояд гуфт, ки рӯзи 13-уми март Эмомалӣ Раҳмон, раисҷумҳури Тоҷикистон ва Содир Жапаров, раисҷумҳури Қирғизистон созишномаи ниҳоӣ дар бораи марзи давлатии Тоҷикистон ва Қирғизистонро дар шаҳри Бишкек имзо карданд. Ҳамчунин, бо ширкати роҳбарони ду давлат ду гузаргоҳи марзӣ ва ҳамин тариқ, марзи ду кишвар, ки беш аз 4 сол боз баста буд, ба таври тантанавӣ боз шуданд. Парлумонҳои ҳар ду кишвар рӯзҳои 18-19 март ин шартномаро ба тасвиб расониданд.

Ҷузъиёти бештари созишномаи сарҳад бо Қирғизистонро дар ин пайванд хонед.

Дар Telegram, Facebook ва Instagram бо мо бимонед.