Рӯзи 17-уми апрел дар толори Бетховени Театри калони академии Русия маросими пуршукӯҳи тақдими ҷоизаи Иттиҳоди Давлатҳои Мустақил – «Ситораҳои Иттиҳод» доир гардид.

Ба академики Академияи улуми Тоҷикистон, олими маъруф Далер Почоҷонов ҷоизаи асосии башрдӯстонаи ИДМ – «Ситораҳои Иттиҳод» тақдим карда шуд.

Намояндаи расмии сафоратхонаи Тоҷикистон дар Маскав Муҳаммад Эгамзод ба «Азия-Плюс» дар ин робита иттилоъ дод, ки дар ин маросим ходимони маъруфи давлатӣ ва ҷамъиятии Русия ва кишварҳои хориҷӣ, дипломатҳо, адибон, роҳбарони муассисаҳои таълимиву илмӣ ва ҷавонон ҳузур доштанд.

Тоҷикистонро сафири ҷумҳурӣ дар Русия Абдулмаҷид Достиев, президенти Академияи улуми ҶТ Фарҳод Раҳимов ва аъзои оилаи олими ба ҷоиза сазоворгардида намояндагӣ карданд.

Зимнан зикр гардид, ки ҳамчунин академики Академияи миллии улуми Украина Борис Патон, Ҳунарманди мардумии Иттиҳоди Шӯравӣ, коргардони театр Олег Табаков, Ҳунарманди мардумии Иттиҳоди Шӯравӣ ва Ҷумҳурии Қазоқистон Бибигул Тулегенова, Рассоми халқии Озарбойҷон Элдар Умар ва дигар ходимони шоистаи илму фарҳанг, дар маҷмӯъ 9 нафар аз кишварҳои узви ИДМ ба ин ҷоиза соҳиб шуданд.