Шоми дирӯз, 8 октябр пас аз бемории начандон тӯлонӣ Қаҳрамони меҳнати сотсиалистӣ, омӯзгор Ҳабиба Каримова, модари муовини нахуствазири Тоҷикистон Марҳабо Ҷабборӣ дар синни 93-солагӣ дар шаҳри Конибодом аз олам даргузашт.

Ҷанозаи марҳум нимаи имрӯз дар масҷиди «Тезгузар»-и шаҳри Конибодом баргузор мешавад.

Ҳабиба Каримова 5 сентябри соли 1923 таваллуд шудааст. Фаъолияти кории ӯ аз соли 1937 дар омӯзишгоҳи педагогии Конибодом оғоз гардида, то соли 1942 ба ҳайси муаллимаи синфҳои ибтидоӣ дар мактаби миёнаи ба номи В.Чапаев кор кардааст. Соли 1942 Ҳабиба Каримова ба унвони «Аълочии маорифи халқи ҶШС Тоҷикистон» сарфароз гардонида шуд.

Аз соли 1942 то соли 1949 мудири қисми илмӣ, сипас аз соли 1949 то соли 1985 вазифаи директори мактаби ба номи Чапаеви шаҳри Конибодомро ба уҳда дошт. Соли 1959 Донишкадаи педагогии Тоҷикистонро хатм намудааст.

Давоми солҳои гуногун вакили Анҷумани умумиитифоқии омӯзгорони Иттиҳоди Шӯравӣ ва Анҷумани омӯзгорони Тоҷикистон интихоб шудааст.

Соли 1978 Ҳабиба Каримова ба унвони Қаҳрамони меҳнати сотсиалистӣ қадрдонӣ шуда, дорандаи ду ордени Ленин ва медалҳои гуногуни Иттиҳоди Шӯравӣ аст.

Ҳайати кормандони гурӯҳи расонаҳои «Азия-Плюс» ба хешону наздикони марҳум самимона ҳамдардӣ изҳор намуда, ба онҳо аз даргоҳи Худованд сабри ҷамил мехоҳанд.