Дар нишасти хабарии рӯзи 19-уми декабр президенти Русия Владимир Путин ба суол дар бораи муҳоҷирон иброз дошт, ки “дар ин ҷо бархе аз онҳо чунон рафтор мекунанд, ки агар дар хона мебуданд, ин хел рафтор намекарданд”.

“Лекин муҳоҷиратро манъ кардан лозим нест, доимо ба танзими он машғул шудан зарур аст”, - гуфт ӯ.

Тавре хабаргузории RG.ru иттилоъ медиҳад, вай дар мавриди вазъи демографӣ изҳор доштааст, ки дар ин самт ду роҳи ҳали мушкилот мавҷуд аст: афзоиши табиӣ ва аз ҳисоби муҳоҷират.

“Дар масъалаи танзими раванди муҳоҷират метавон аз таҷрибаи аврупоӣ истифода кард. Дар Канада як Вазорати ҷудогонаи муҳоҷират амал мекунад, лекин дар он ҷо на ҳамаро мепазиранд: синну сол, вазъи солимӣ ва маълумот муҳим аст”, - афзуд президенти Русия.

Ба андешаи ӯ, барои Русия низ тарзи интихобӣ мувофиқ буда, ба ҷомеаи он касоне осонтар мутобиқ мешаванд, ки забони русиро донанд ва бо фарҳанги мардуми рус ошно бошанд.

“Масалан, барои муҳоҷирон аз Беларусу Украина ва Молдова мутобиқшавӣ осонтар аст. Аҳолии маҳаллӣ низ ба чунин муҳоҷирон нисбатан оромона муносибат мекунанд”, - иброз дошт Путин.

Вай афзуд, ки ба зодагони Осиёи Миёна мушкилтар буда, барои тағйири ин вазъ роҳандозии курсҳои омӯзиши забони русӣ, ифтитоҳи филиалҳои мактабҳои олӣ дар ин кишварҳо мувофиқи мақсад аст.

“Ин барои худро бароҳат ҳис кардан, ҳамчунин аз байн бурдани муносибати нохуби сокинони маҳаллӣ ба онҳо, ки бо ҳодисаҳои беҳурматии муҳоҷирон ба фарҳангу таърихи мо дучор мешаванд, лозим аст. Ин барои муҳоҷирони дохилӣ низ рабт дорад. Онҳо ҳам рафторашонро дигар мекунанд”, - гуфтааст ӯ.

Путин мутмаин аст, ин маънои онро надорад, ки муҳоҷиратро мебояд манъ кард.

“Иқтисод ба қувваи корӣ ниёз дошта, норасоияш омили боздошти рушди он мешавад. Лекин раванди муҳоҷиратро оқилона ва мунтазам мебояд танзим кард”, - таъкид дошт президенти Русия.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.