Раиси Вилояти Мухтори Кӯҳистони Бадахшон Ёдгор Файзов ва мардуми Тоҷикистон ғолиби озмуни Central Asia's Got Talent Чоршанбе Аловатовро шодбош гуфтанд.

“Барои ман боиси ифтихор ва сарбаландист, ки фарзанди кӯҳистон Чоршанбе Аловатов бо овози ширини хеш ва ансамбли рақсии "Падида" бо рақсҳои зебои тоҷикона фарҳангӣ миллати тоҷикро дар арсаи байналмилалӣ муаррифӣ карданд. Кулли мардуми сарбаланди Бадахшон бо шумо ифтихор доранд. Ғолибияти шумо мояи сарбаландии мо мебошад. Ба шумо дар ҷодаи интихобкарда минбаъд низ пирӯзиҳои нав ба нав таманно дорам”, - навиштааст имрӯз дар номаи табрикотӣ раиси ВМКБ Ёдгор Файзов.

Ҳамзамон ӯро ҳазорон тоҷикистонӣ тавассути шабакаҳои иҷтимоӣ аз дохилу хориҷи кишвар таҳният гуфтанд.

Чоршанбе Аловатов нимаи дуюми имрӯз аз Қазоқистон ба Ватан баргашт. Ӯро дар фурудгоҳи Душанбе намояндагони мақомоти давлатӣ, рӯзноманигорон ва садҳо нафар ҳаводорони ҳунараш бо гулдастаҳо ва парчами Тоҷикистон истиқбол гирифтанд. Ҳозирин бо хушнудию ифтихор номи ӯро шиорпартоӣ мекарданд.  
Ёдовар мешавем, дирӯз шаҳрванди Тоҷикистон Чоршанбе Аловатови 22-сола дар даври ниҳоии озмуни шахсони боистеъдоди Central Asia's Got Talent миёни 12 довталаб аз Қазоқистон, Қирғизистон, Тоҷикистон ва Ӯзбекистон шоҳҷоизаро ба даст овард. Ӯ бо маҳорати баланди овозхонияш қалбҳои доваронро тасхир кард. Ҳамзамон теъдоди аз ҳама бештари бинандагон аз 4 кишвари Осиёи Марказӣ ба ҷонибдории Чоршанбе Аловатов раъй доданд. Барои пирӯзияш ба ӯ 10 000 000 танга (25,5 ҳазор доллар) мукофотпулӣ тақдим шуд.

Ӯ чанде пеш дар мусоҳибаи Радиои “Азия-Плюс” 107FM оид ба фаъолияти эҷодии худ нақл карда буд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.