Портали сайёҳии ТурСтат раддабандии баландтарин арчаҳои асосии пойтахти кишварҳои ИДМ-ро дар Соли нави 2020 нашр кард.
Баландтарин арчаи солинавӣ байни кишварҳои ИДМ дар Ашқобод гузошта шудааст – 40 метр. Он дар майдони назди маркази фарҳангию фароғатии "Älem" (олма) қомат афрохта, 15-уми декабри соли 2019 фурӯзон шуд.
Дар зинаи дуюм пойтахти Арманистон – шаҳри Ереван қарор дошта, баландии арчаи солинавии он дар Майдони Ҷумҳурият ба 37 метр мерасад. Чароғҳои он 21-уми декабр фурӯзон шуданд.
Дар идома шаҳри Тошканд зикр мешавад, ки арчаи солинавии он дар кӯчаи Истиқлол, назди Китобхонаи миллии ба номи Навоӣ 36 метр баландӣ дошта, чароғҳои онро 10-уми декабр даргиронданд.
Арчаи солинавии Озарбойҷон бо баландии 34 метр дар майдони Азнефт дар шаҳри Боку қомат афрохтааст.
Баландии арчаи асосии Беларус дар майдони Октябри шаҳри Минск 30 метр буда, чароғҳояш 14-уми декабр фурӯзон шуд.
Пас аз Минск пойтахти Тоҷикистон – шаҳри Душанбе ҷойгир шудааст, ки арчаи солинавии он 29 метр баландӣ дошта, аз арчаи асосии солинавии Русия дар Майдони Сурхи Маскав (27 метр) баландтар аст.
Қобили зикр аст, ки арчаи асосии солинавии Русия ягона арчаи зинда дар пойтахтҳои кишварҳои узви ИДМ мебошад, ки дарахти он аз ҳавзаи Можайск бурида шуда, дар вазъи тантанавӣ 24-уми декабр чароғҳояш фурӯзон мешавад.
Арчаи солинавии Қирғизистон дар майдони “Ала-тоо”-и шаҳри Бишкек низ 27 метр баландӣ дошта, рӯзи 13-уми декабр чароғу бозичаҳояш фурӯзон шуданд.
Дар пойтахти Қазоқистон – шаҳри Нур-Султон арчаи солинавӣ дар қаламрави намоишгоҳи ЭКСПО-2017, дар назди гӯшаи "Нур Алем" гузошта шуда, 25 метр аст.
Арчаи пасттарин миёни кишварҳои узви ИДМ дар пойтахти Молдова – Кишинёв гузошта шуда, 20 метр аст. Он дар майдони Маҷлиси бузурги миллӣ қомат афрохта, 1-уми декабр ботантана фурӯзон шуд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.