Рӯзи 13-уми январ филмҳои довталаби ҷоизаи “Оскар-2020” эълон шуданд. Дар бахши филми кутоҳмуддати тасвирӣ маҳсули зодаи Тоҷикистон Даря Кашеева зикр шудааст.
Дар ин бора Кашеева дар торнамои худ хабар додааст. Филми кӯтоҳмуддати “Духтар” (Дочь) дар бораи муносибатҳои душвори падару духтар ҳикоят мекунад.
Ин филми тасвирӣ соли 2019 ба сифати кори дипломӣ дар Академияи ҳунарҳо дар Прага (FAMU) наворбардорӣ шудааст. Бори нахуст дар ҷашнвораи филмҳои тасвирӣ дар Аннеси намоиш дода шуда, барои беҳтарин филми донишҷӯйӣ соҳиби ҷоизаи “Кристалл” шуд.
Даря Кашеева дар Тоҷикистон таваллуд шудааст. Аввали солҳои 90-ум хонаводааш ба Русия мекӯчанд. Айни замон ӯ бо шавҳараш дар Прага зиндагӣ мекунад.
“Ман дар Тоҷикистон ба дунё омадаам, вале ҳамаи аҳли оилаамон русанд. Вақте чаҳорсола будам, Иттиҳоди Шӯравӣ пош хӯрда, дар Тоҷикистон ҷанги шаҳрвандӣ оғоз гардид... Бо аҳли хонавода ба Русия кӯчидем. То 16-солагӣ дар Валдай зиндагӣ карда, аввал ба Великий Новгород ва сипас дар 17-солагӣ ба Маскав рафтам. Аввалҳо хуб буд, аммо баъд дар пойтахт худро ноҳинҷор ҳис мекардам. Аз ин рӯ, Маскаву Валдай ва Душанберо ҷойи худӣ эҳсос намекунам. Ҳамаи онҳо гӯё макони муваққатӣ буданд”, - иброз доштааст ӯ дар мусоҳибаи «АфишаDaily».
Филми “Духтар” соҳиби зиёда аз 30 ҷоизаю мукофоти ҷашнвораҳои синамои байнулмилалӣ ва донишҷӯйӣ шудааст.
Ёдрас мекунем, ки маросими тақдими ҷоизаҳои “Оскар-2020” рӯзи 9-уми феврал дар Лос-Анҷелес баргузор мешавад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
Руcский