Президенти Русия Владимир Путин баргузории гузашти низомӣ бахшида ба Рӯзи Ғалабаро аз сабаби вазъ бо коронавирус ба вақти дигар мавқуф гузошт. Дар ин бора нашрияи Коммерсант хабар медиҳад.

Зимни машварати Шӯрои амнияти Русия ӯ ба сохторҳои қудратӣ дастур дод, ки муҳлатҳои омодагӣ ба чорабиниҳои бахшида ба ифтихори 75-солагии Ғалаба дар Ҷанги Бузурги Ватаниро дар Маскав ва минтақаҳо ба вақти дигар гузаронанд. Раисҷумҳури Русия гуфт, гузашти низомӣ дар Майдони сурх ва раҳпаймоии “Полки ҷовидон” имсол баргузор мешаванд, вале санаи дақиқи онро номбар накард.

“Ошкор мегӯям, ки ҳозир назди интихоби душвор қарор дорем. Ва санаи 9 май барои мо муқаддас ва ҳаёти ҳар як инсон низ муқаддас аст, - иброз дошт ӯ. – Барои баргузории гузашти низомии 9 май омодагии он бояд аз ҳозир оғоз гардад, вале хатарҳои марбут ба эпидемия, ки авҷаш ҳоло нагузаштааст, ҳанӯз ҳам фавқулода зиёд аст ва ин ба ман ҳуқуқ намедиҳад, ки мустақиман аз ҳозир омодагиро ба гузашти низомӣ ва дигар чорабиниҳои оммавӣ шурӯъ кунам”.

Рӯзи 15 апрел роҳбарони 12 ташкилоти собиқадорон аз Путин дархост намуданд, ки гузашти низомиро ба вақти дигар гузаронад. Ба ақидаи онҳо, зимни баргузории чорабинӣ ба мардум кафолати солими додан ғайриимкон мебошад. Собиқадорон пешниҳод карданд, ки он ба вақти дигар гузаронида шавад, ба вақте ки “мувофиқи вазъи эпидемиологӣ гузашти низомӣ на хатар бошад, балки воқеан ба тантанаи сулҳу амният табдил ёбад”.

Қаблан дар Кремл изҳор дошта буданд, ки бинобар сабаби коронавирус иштироки собиқадорон дар гузашти низомӣ ба салоҳи кор нест.

Қобили зикр аст, ки шабонарӯзи гузашта дар Русия 3448 ҳолати нави сироят аз COVID-19 сабт шуда, шумори умумии сироятёфтагон ба 27 ҳазору 938 нафар расид. Ҳамагӣ 2304 нафар аз беморӣ шифо ёфта, 232 кас фавтиданд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.