Бо мақсади дастгирии кормандони тиббӣ ва маризони Беморхонаи марказии вилоятии шаҳри Хоруғ, аз номи сарвари давлат Эмомалӣ Раҳмон ба ин муассисаи тиббӣ 20 тонна кумаки башардӯстона расонида шуд.

Дар Хоруғ онро раиси вилоят Ёдгор Файзов қабул карда, бо изҳори сипос қайд намуд, ки ин кумак хеле сарвақтист.

Кумак аз 4 тонна орд, 2-тоннагӣ биринҷу шакар, макарону картошка, пиёзу сабзӣ, инчунин таҷҳизоти тиббӣ, ниқобу антисептикҳо, доруворӣ ва либоси махсус иборат аст.

Ба гуфтаи сардори Раёсати тандурустии ВМКБ Фарид Музаффаров, ба туфайли дастгирии ҳамаҷониба ҳайати тиббии беморхона “устуворона баҳри ҳифзи солимии аҳолӣ талош меварзад”.

“Хеле хурсандиовар аст, ки ҳафтаи охир дар минтақа 138 нафар шифо ёфта, аз беморхона ҷавоб дода шуданд”, - иброз дошт ӯ.

Ёдрас мекунем, ки қаблан ширкати “Помир энержи” ба маблағи қариб 296 ҳазор сомонӣ ба беморхонаи вилоятии Хоруғ кумак расонид.

Ин кумак 30 ҳазор ниқоб, 2 ҳазор дастпӯшак, 10 адад либоси махсус барои кормандони тиббӣ, спирти тиббӣ, хлор ва 1 дастгоҳи нафасдиҳии сунъӣ (ИВЛ)-ро дар бар мегирифт.

Ба иттилои корманди ширкати мазкур Хоҷамир Қурбонбеков, нархи дастгоҳи нафасдиҳии сунъӣ дар бозор 125 ҳазор сомониро ташкил дода, он бо дархости табибони беморхонаи вилоятӣ харида шудааст.

Сардухтури беморхона Саидбек Давлатбеков изҳор дошт, ки ин дастгоҳ барои беморхона аҳаммияти калон дорад.

“Минбаъд бо кумаки он муолиҷаи гирифторони диққи нафас (астма) ва бронхит, илтиҳоби шуш (пневмония) ва дигар бемориҳои роҳи нафас имконпазир мешавад”, - гуфт сардухтур.

Дар ҳамин ҳол, сокинони 17 маҳаллаи шаҳри Хоруғ аз ҳисоби худ ихтиёрӣ ва бонавбат барои беморону кормандони беморхона хӯрок тайёр мекунанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.