Ташкилотҳои ҷамъиятии Чин ва бародаршаҳрҳои Душанбе – Синдао ва Сямин ба Тоҷикистон ба маблағи умумии 479,6 ҳазор доллар зиёда аз 6,5 тонна кумаки башардӯстона фиристоданд.

Тавре ба “Азия-Плюс” котиби матбуотии сафорати Чин дар Тоҷикистон Сун Хунчжи хабар дод, маросими супурдани кумак рӯзи 10-уми май дар дидбонгоҳи назоратии “Қулма-Қарасу” баргузор шудааст.

“Кумак аз 17 дастгоҳи нафасдиҳии сунъӣ (ИВЛ), беш аз 48 ҳазор ниқоби муҳофизатии тиббӣ, қариб 397 ҳазор ниқоби тиббии яккарата, 47 ҳазор ниқоби тиббии ҷарроҳӣ, 11 ҳазору 750 маҷмӯи либоси муҳофизатии тиббӣ, 20 ҳазору 600 ҷуфт дастпӯшак, 11 ҳазор айнаки муҳофизатӣ, 900 ҳароратсанҷ ва 5 ҳазор экран-ниқоби муҳофизатӣ иборат аст”, - гуф Хунчжи.

Ба гуфтаи ӯ, ин кумаки аввали Чин ба Тоҷикистон набуда, барои мубориза бо пандемия ҳукумати Чин инчунин ду баста борҳои зиддиэпидемикӣ ирсол кардаву мекунад.

Бастаи аввал, ки рӯзи 30-юми март дода шуд, аз 2 ҳазор маҷмӯи реагентҳо барои ошкор кардани коронавирус, либоси муҳофизатӣ ва дигар лавозимоти тиббии мавриди ниёзи аввал иборат буд.

“Дар бастаи дуюм Чин ба Тоҷикистон 50 ҳазор тест-низом барои ташхис, 30 ҳазор хилъати тиббии муҳофизатӣ, 30 ҳазор ниқоби тиббии навъи №95, 150 ҳазор ниқоби ҷарроҳӣ, 50 ҳазор ҷуфт дастпӯшакҳои тиббӣ, 30 ҳазор айнаки тиббӣ ва 1 ҳазор тепловизор мефиристад”, - иброз дошт котиби матбуотии сафорат.

Зикр шуд, ки қисми якум аз бастаи дуюм (50 ҳазор тест-низом) рӯзи 6-уми май дар гузарогоҳи “Қулма-Қарасу” дар сарҳади байни кишварҳо ба Тоҷикистон супурда шуда, ду қисми дигари баста ба наздикӣ оварда мешаванд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.