Озмоишгоҳи ташхиси коронавируси COVID-19 рӯзи 28 май дар заминаи Маркази назорати давлатии санитариву эпидемиологии вилояти Суғд ба кор оғоз намуд, ки алҳол ягона дар қаламрави ин минтақа мебошад.

Тавре ба “Азия-Плюс” муовини роҳбар оид ба корҳои эпидемиологии Марказ Рустам Собиров хабар дод, озмоишгоҳ бо дастгирии Вазорати тандурустӣ, ҳукумати вилоят ва USAID боз шуда, шабонарӯзӣ дар се баст кор мекунад ва таҷҳизоти муосири он ба баргузории 34 ташхиси коронавирус имкон дода, дар як шабонарӯз 22 маводи биологии шахсоне, ки дар бемористону дармонгоҳҳои вилоят аз тест гузаштаанд, қабул мешавад.

Рустам Собиров
Сурат: Asia-Plus

“Нуҳ нафар мутахассисони тиббии соҳибтаҷрибаи маҳаллӣ, ки қаблан аз ВНМО, бемори сил ва гепатит ташхис мегирифтанд, дар пойтахт аз давраи омӯзишии махсуси панҷрӯза гузашта, барои машваратҳои иловагӣ имрӯз мутахассисон аз озмоишгоҳи ҷумҳуриявии вирусологӣ низ меоянд”, - қайд кард Собиров.

Ба гуфтаи ӯ, натиҷаҳои тест дар муддати ду рӯз маълум шуда, ба хато роҳ додан ё омехта (алиш) кардани онҳо ғайримкон аст, зеро ба ҳар кадоме аз маводи биологӣ навиштаҷот бо ҳама маълумот дар бораи шахси тестдода часпонида шудааст.

Зимнан зикр шуд, ки дигар кормандони тиббии шаҳру ноҳияҳои вилоят низ барои омӯзиш ба ин марказ ҷалб карда мешаванд.

“Аз 28 май ошёнаи дуюми марказ комилан ҷудо шуда, кормандон бидуни тарки озмоишгоҳ 14 рӯз кор мекунанд ва сипас ба муддати 2 ҳафта ба карантин гирифта шуда, ба ҷойи онҳо гурӯҳи нави табибон ба кор шурӯъ мекунанд, - мегӯяд Собиров. - Кормандони озмоишгоҳ бо тамоми шароити зист, истироҳат ва ғизо таъминанд”.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.