Масҷидҳо дар Тоҷикистон дари худро барои ибодаткунандагон боз карда метавонанд. Дар ин бора ба “Азия-Плюс” раиси Шӯрои уламои кишвар Саидмукаррам Абдуқодирзода хабар дод.

“Дар ҷаласаи навбатии Шӯрои уламои Маркази исломии Тоҷикистон, ки ояндаи наздик доир мегардад, масъалаи дубора ба фаъолият оғоз кардани масҷидҳо баррасӣ мешавад. Алҳол дақиқан гуфта наметавонам, ки онҳо кай боз мешаванд. Мо аз Вазорати тандурустӣ маълумотро дар бораи вазъи эпидемиологӣ дар кишвар интизорем. Бо назардошти маълумоти онҳо, сари қароре меоем”, - гуфт Абдуқодирзода.

Лекин эҳтимоли боз шудани масҷидҳоро пас аз ҷаласа аз эҳтимол дур намедонад. “Агар чунин қарор қабул кунем, тамоми тадбирҳои пешгириву эҳтиёткориро меандешем”, - қайд кард ӯ.

Масҷидҳо дар Тоҷикистон аз 18 апрел бастаанд. Шӯрои уламои Тоҷикистон ба хотири пешгирии паҳншавии сирояти коронавирус баргузории намозҳои дастаҷамъона, намози ҷумъа, намози таровеҳро дар моҳи Рамазон дар масҷидҳо манъ кард. Намози дастаҷамъонаи Иди Рамазон низ баргузор нашуд.

Ҳанӯз рӯзи 4 март Шӯрои уламо ба сокинони кишвар тавсия дод, ки ҷиҳати пешгирӣ ва эмин нигоҳ доштани шаҳрвандон аз эҳтимоли сироятёбӣ ва паҳн шудани бемории коронавирус, аз намозгузории дастаҷамъона дар масҷидҳо, аз ҷумла масҷидҳои ҷомеъ, панҷвақта ва ҷамоатхонаҳо, ба истиснои намози ҷаноза муваққатан худдорӣ кунанд.

Лекин шурӯъ аз 20 март Кумитаи дини Тоҷикистон хабар дод, ки сокинони кишвар метавонанд дар масҷидҳо намоз гузоранд, лекин баъди як моҳ боз онҳоро баст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.