Русия ҷиҳати рушди низоми устувори ғизои мактабӣ дар Тоҷикистон ба Барномаи озуқавории ҷаҳонии СММ (БОҶ) 11,2 млн доллар маблағ ҷудо мекунад.

Ин маблағ ба амалисозии марҳилаи сеюми хотимавии лоиҳаи ҳамноми Русия ва БОҶ барои солҳои 2020-2023 равона мегардад. Аз ҷумла ба барномаҳои таъмиру муҷаҳҳазгардонии ошхонаҳо, такмили ихтисоси кормандони мактабҳо, инчунин баргузории маъракаи иттилоотӣ оид ба пешбурди истеъмоли ғизои солим.

Ғайр аз ин, Русия барои харидории маҳсулоти хӯроквории Русия барои эҳтиёҷоти хонандагони мактабҳои Тоҷикистон дар давраи солҳои 2020-2021 иловагӣ 10 млн доллар ихтисос медиҳад.

“Муддати 6 сол инҷониб Русия дар ҳамдастӣ бо БОҶ аз талошҳои ҳукумати Тоҷикистон дар мавриди бунёди низоми худкифои миллии ғизои мактабӣ пуштибонӣ мекунад, - таъкид дошт сафири Русия дар Тоҷикистон Игор Лякин-Фролов. - Ин яке аз лоиҳаҳои бузургтарин дар ҷумҳурӣ мебошад, ки буҷети умумии он ба 80 млн доллар наздик шуд. Мусоидат ба рушди муносиб ва солими хонандагони ҳозираи мактабҳои Тоҷикистон - саҳми муҳими Русия ба ояндаи тамоми Тоҷикистон аст”.

Барномаи ғизои мактабии БОҶ дар Тоҷикистон соли 2013 бо дастгирии молиявии Русия оғоз гардида, калонтарин барнома дар Тоҷикистон ба шумор меравад ва ӯҳдадории амиқи ташкилотро дар роҳи беҳбуди зиндагӣ нишон медиҳад. Дар ҷомеаҳои осебпазир ва дорои ноамнии озуқаворӣ, таъмини ғизои солим ба кӯдакон дар мактаб метавонад маънои натанҳо ғизо ва саломатии беҳтарро дошта бошад, балки дастрасӣ ба таҳсилро низ афзоиш диҳад.

Дар Тоҷикистон БОҶ ба дастгирии барномаҳои рушд, ки ба таҳкими иқтидорҳои институтсионалӣ мусоидат менамоянд, таваҷҷӯҳи хоса медиҳад. Аз соли 1999 инҷониб, созмони болозикр дар якҷоягӣ бо ҳукумати Тоҷикистон дар самти татбиқ ва идоракунии Барномаи ғизои мактабӣ дар кишвар ҳамкорӣ мекунад.

Дар самти таҳкими амнияти озуқавории кишвар Русия шарики калидии Тоҷикистон ва БОҶ ба шумор меравад. Дастгирии Русия дар ин самт бо амалисозии лоиҳаи зикргардида маҳдуд намешавад. Аз ҷумла, давоми солҳои 2005-2012 ҳукумати Русия тариқи БОҶ ба Тоҷикистон ҷиҳати харидории ғизо барои сокинони эҳтиёҷманди кишвар 36,5 млн доллар ҷудо карда буд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед