Шабонарӯзи гузашта дар ҷумҳурӣ 43 ҳодисаи нави сироятёбӣ аз бемории коронавирус ба қайд гирифта шуд.

Бино ба маълумоти Вазорати тандурустӣ ва ҳифзи иҷтимоии аҳолии ҶТ, дар маҷмӯъ шумораи гирифторони ин беморӣ ба 7 ҳазору 235 нафар расид.

Боз 1 ҳолати фавт аз ин беморӣ ба қайд гирифта шуда, ҳамин тариқ теъдоди умумии фавтидагон аз коронавирус 60 нафарро ташкил медиҳад.

Гуфта мешавад, то субҳи 28-уми июл 86 нафар гумонбарон зери назорати табибон қарор дошта, 58 кас баъд аз муолиҷа ба хонаҳояшон рухсат дода шуданд. Теъдоди умумии шифоёфтагон 6 ҳазору 28 нафар ё худ 83,3%-ро ташкил медиҳад.

Боз 1 ҳазору 200 нафар таҳти муоинаи табибон қарор дошта ё бо тавсияи табибон дар хонаҳояшон муолиҷа мегиранд.

Дар ҳамин ҳол, Ситоди ҷумҳуриявӣ оид ба пурзӯр намудани чораҳои зиддиэпидемиявӣ  ва пешгирӣ аз  интиқолу паҳншавии бемории сироятии COVID-19 бо мақсади ҳифзи солимии ҷомеа, таъмини  бехатарии аҳолӣ ва пешгирӣ аз  паҳншавии мавҷи дуюми ин бемории сироятӣ дар Тоҷикистон баргузории ҳама гуна ҷамъомадҳо, гаштугузорҳо, инчунин идгардак  дар  рӯзи иди Қурбонро  манъ кард.

Тавре АМИТ “Ховар” хабар медиҳад, Ситоди ҷумҳуриявӣ Кумитаи дин, танзими анъана ва ҷашну маросимҳоро вазифадор кард, ки  якҷо бо мақомоти иҷроияи ҳокимияти давлатии вилоятҳо, шаҳру ноҳияҳо ва комиссияҳои доимии маҳаллӣ вобаста ба риоя шудани талаботи мазкур корҳои фаҳмондадиҳиро дар байни аҳолӣ тақвият  бахшанд.

Ҳамзамон Ситоди ҷумҳуриявӣ аз сокинони мамлакат даъват кард, ки дар асоси тавсияи мутахассисони соҳаи тандурустӣ амал карда, қоидаҳои гигиенаи шахсию ҷамъиятӣ, фосилаи байниҳамдигарӣ ва истифодаи   ниқобҳои тиббии муҳофизатиро   қатъиян риоя намоянд.

Ёдрас мекунем, ки дар Тоҷикистон имсол Иди Қурбон рӯзи 31 июл ҷашн гирифта мешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.