Ҳукумати Тоҷикистон шумори гурӯҳи осебпазири аҳолиро, ки ба онҳо дар доираи пешгирии таъсири COVID-19 ба бахшҳои иҷтимоӣ ва иқтисодии ҷумҳурӣ дар ҳаҷми як андозаи музди меҳнати ҳадди ақал (400 сомонӣ) кумаки яквақта расонида мешавад, пешниҳод кард.

Мувофиқи замима ба қарори ҳукумат аз 11 июл, шумори умумии пешакии чунин шахсон наздики 488 ҳазор нафарро ташкил медиҳад.

Аз ҷумла, чунин гурӯҳи аҳолӣ кумак гирифта метавонад:

- шаҳрвандоне, ки нафақаи иҷтимоӣ мегиранд - 70 ҳазор нафар;

- маъюбон - 149 ҳазору 860 нафар;

- ятимон ва кӯдаконе, ки бе саробон мондаанд - 82 ҳазор нафар;

- кӯдакони маъюби синии то 16-солаи гирифтори ВНМО/БПНМ (ВИЧ/СПИД) - 1 ҳазор нафар;

- шаҳрвандони камбизоат - 184 ҳазору 644 нафар;

- гурезагони камбизоат - 300 нафар.

Гуфта мешавад, дар рӯйхат гурӯҳи осебпазири аҳолӣ ба ҳолати то 1 июни соли 2020 зикр шуда, аз ин рӯ, шумори нафақахӯрони иҷтимоӣ, маъюбон, кӯдакони ятими бе саробон тағйир ёфта метавонад.

Дар қарор ба сохтор ва мақомоти дахлдор дастур дода шудааст, ки то 1 августи соли 2020 рӯйхати шахсони дохил ба гурӯҳҳои осебпазири аҳолиро бо нишон додани насаб, ном, номи падар (дар ҳолати будан) ва ҷойи истиқомат тартиб дода, ба Вазорати молия ва БДА «Амонатбонк» пешниҳод намоянд.

Вазорати молия ба мувофиқи тартиби муқарраргардида ҷудо кардани маблағ барои пардохти кумакпулии яквақта ба гурӯҳҳои осебпазири аҳолӣ ва БДА “Амонатбонк” ба таъмини интиқоли саривақтии маблағҳои мақсадноки ба суратҳисобаш воридгардида бо истифода аз кортҳои пардохтии бонкӣ ва ба шахсоне, ки дар рӯзи гирифтани кумакпулии яквақта кортҳои пардохтии бонкӣ надоранд, тариқи нақдӣ вазифадор карда шуданд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.