Адиби русзабони тоҷик Темур Зулифқоров, ки ба дарёфти ҷоизаи “Ситораҳои Иттиҳод” қадрдонӣ шуд, 2 млн рубл маблағи ҷоизаро ба одамони камбизоат тақсим карданист. Дар ин бора худи шоир ба “Азия-Плюс” хабар дод, ки аз сазовор дониста шуданаш ба ин ҷоиза изҳори хушнудӣ мекард.

Ҷоизаи байнидавлатии “Ситораҳои Иттиҳод” аз ҷониби Шӯрои ҳамкории гуманитарии кишварҳо соли 2009 таъсис дода шудааст. Ҷоиза дар се бахш - илму маориф, фарҳангу ҳунар ва ҳамчунин фаъолияти гуманитарӣ тақдим гардида, аз мукофотпулӣ (2 млн. рубл), ифтихорнома, нишони фахрии ҷоизадор ва шаҳодатнома ба он иборат аст.

“Тӯли панҷ сол ман дар шароити камбизоатӣ зиндагӣ мекардам. Чи тавре ки мегӯянд, либосу пойафзоли дарида дар бар доштам. Дар робита ба ҷоиза гуфтаниам, ки гирду атрофам одамони камбизоат хеле зиёданд, аз ин рӯ, ба оилаҳое, ки зиндагии хеле фақирона доранд, кумак мекунам. Ба назарам, Худо ба одамон барои он пул медиҳад, то ки ба шахсони бештар камбизоат ёрӣ расонад”, - гуфт Темур Зулфиқоров.

Ӯ ба президенти кишвар барои муссоидати ба ватан баргаштанаш изҳори миннатдорӣ намуд:

“Шоду мамнун ва аз президент миннатпазирам, ки ба туфайли ӯ ба ватан баргаштанам муяссар шуд. Мудом таваҷҷуҳашро ба худ эҳсос мекунам. Адабиёти бузург ҳамеша бо ҳокимони бузург ҷараён мегирад”, - гуфт шоир.

Адиб қайд кард, ки пулашро барои нашри китобҳояш харҷ карданӣ нест:

“Мухолифи онам, ки муаллиф бо пули худаш китобҳояшро чоп кунад. Бигзор дигарон чоп кунанд, на муаллиф”, - изҳор дошт Зулфиқоров.

Темур Зулфиқоров чанде пеш 84-солагиашро ҷашн гирифт. Мусоҳибаи мо бо шоир дар ин хусус бо суроғаи зерин қобили дарёфт аст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.