Бо қарори Сиоди ҷумҳуриявӣ ва шаҳрдории пойтахт, баргузории зиёфатҳои солинавии ҳамкорон (корпоративҳо) ва дигар чорабиниҳои оммавӣ манъ карда мешавад, хабар доданд ба “Азия-Плюс” аз дастгоҳи раиси шаҳри Душанбе.

Қаблан бар асари пандемияи коронавирус таҷлили Соли нави мелодӣ дар Тоҷикистон манъ шуда, арчаи солинавӣ низ дар Душанбе гузошта намешавад.

“Дар қарор гуфта мешавад, танҳо дар ҳамин сол гузаронидани ҳама гуна чорабиниҳои тантанавӣ, аз ҷумла ташкили арчаи солинавӣ, чорабиниҳои фарҳангии оммавӣ, нишастҳои ҷашнӣ, шабнишиниҳо ва дигар чорабиниҳои оммавӣ ба муносибати Соли нави мелодии 2021 дар ҳудуди шаҳри Душанбе манъ карда шавад”, - шарҳ доданд дар шаҳрдории пойтахт.

Ба савол дар бораи ба қаҳвахона ва тарабхонаҳои Душанбе иҷоза додани ташкили барномаҳои солинавӣ посухи дақиқ нагирифтем.

“Онҳо кор карда, мизоҷонро дар шомҳои солинавӣ қабул мекунанд, лекин ба ҳар ҳол, баргузории чорабиниҳои оммавӣ манъ аст. Яъне одамон дар ин рӯзҳо чун ҳарвақта ба тарабхонаву қаҳвахонаҳо рафта метавонанд. Табиист, ки дар ин муассисаҳо бояд ҳамаи тадбирҳои бехатарӣ риоя шавад”, - изҳор доштанд дар шаҳрдорӣ.

Ҳамчунин зикр шуд, ки шояд наздикиҳои фарорасии Соли нав боз баъзе ҷузъиёти ин масъала дақиқ ва аз ҷониби Ситоди ҷумҳуриявӣ қарори дахлдор қабул шавад.

Қаблан зикр гардида буд, ки мувофиқи қарори Ситод, ба сайру гашти мардум дар боғҳои фарҳангу фароғатӣ, гулгашту хиёбонҳо ва дигар ҷойҳои ҷамъиятии шаҳр танҳо бо дарназардошти риояи ҳатмии қоидаҳои гигиенаи шахсиву ҷамъиятӣ, истифодаи ҳатмии ниқобҳои муҳофизатӣ ва риояи қатъии фосилаи иҷтимоӣ дар масофаи байниҳамдигарии аз 1,5 то 2 метр иҷоза дода мешавад.

Баъдан шаҳрдории Душанбе қарор кард, ки имсол дар маркази пойтахт ва боғҳои фарҳангу истироҳати пойтахт рамзи Соли нав - арча гузошта намешавад.

Қобили зикр аст, ки ҳамасола сокинону меҳмонони шаҳри Душанбе рӯзи 31 декабр ҷашни фарорасии Соли нави мелодиро дар майдони асосии пойтахт - “Дӯстӣ” ҷашн мегирифтанд. Солҳои ахир дар ин майдон арчаи солинавии баландиаш зиёда аз 25 метр гузошта мешуд.

Дар ҳамин ҳол, муовини сарвазири Қирғизистон Элвира Сураболдиева зимни як брифинги онлайнӣ изҳор доштааст, ки дар ин кишвар низ баргузории зиёфатҳои солинавии ҳамкорон манъ карда мешавад. Ба гуфтаи ӯ, қабули чунин қарор ба вазъи марбут ба сирояти коронавирус дар кишвар вобаста аст, иттилоъ медиҳад kabar.kg.

“Дар чунин чорабиниҳо одамони зиёд ҷамъ меоянд, одамон либосҳои сабук мепӯшанд ва ин ҳам дар замони зукоми мавсимӣ. Ҳама медонем, ки ҳозир масофаи иҷтимоӣ ва реҷаи ниқобпӯшӣ умуман риоя намешавад. Аз ин рӯ, нишастҳои солинавии ҳамкорон манъ аст, бахусус барои хизматчиёни давлатӣ”, - таъкид доштааст ӯ.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.