Ҳисорӣ Ҷӯраев фарзанди овозхони шинохтаи тоҷик Акашариф Ҷӯраев бар асари беморие, ки дошт рӯзи 18-уми декабр дар Душанбе даргузашт. Дар ин бора наздикону пайвандони ӯ хабар доданд. Раёсати фарҳанги Душанбе ҳам дар бо нашри як номаи ҳамдардӣ даргузашти Ҳисорӣ Ҷӯраевро барои хонавода ва аҳли ҳунар таслият гуфтаанд.

"Аҳли Раёсати фарҳанги шаҳри Душанбе аз даргузашти фарзанди Ҳофизи халқии Тоҷикистон , зиндаёд Акашариф Ҷӯраев, Ҳисорӣ Ҷӯраев сахт андуҳгин гашта, ба наздикон, хешутабор ва мухлисонаш ҳамдардии худро изҳор менамоянд. Равонашон шоду хонаи охираташон обод бошад",-омадааст дар ин номаи таслият.

Ҳисорӣ Ҷӯраев номзади илмҳои химия буд ва то дами марг дар Пажуҳишгоҳи илмиву таҳқиқотии ғизои Вазорати саноат ва технологияҳои нав ба сифати мудири Озмоишгоҳи назорати амнияти маҳсулоти хӯрокӣ ва маводи хоми ғизоӣ кор мекард.

Ӯ ҳамчунин мушовири Пажӯҳишгоҳи дорусозии вазорати тандурустӣ низ буд.

Ҳисорӣ Шарифов ба унвони фарзанди овозхони пуровозаи тоҷик Акашариф Ҷӯраев, ки Филармонияи давлатии Тоҷикистон ба номи ӯст, овозхонӣ низ мекард. 

Гуруҳи расонаҳои "Азия-Плюс" аз марги ин донишманд ва овозхони шинохта андуҳгин буда, ба хонаводаву наздикону пайвандонашон дар ин мусибати азим сабру шикебойӣ мехоҳанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.