Рӯзи 20 январ пас аз таваққуфи тӯлонӣ аввалин парвоз бо хатсайри мунтазам аз Тошканд ба Душанбе анҷом дода шуд. Аз дар кадом рӯзҳо сурат гирифтани парвозҳо байни шаҳрҳо ва арзиши битеҳои он огаҳӣ ёфтем.

Парвози наздиктарин бо хатсайри Тошканд-Душанбе-Тошканд рӯзи 27 январ аз ҷониби ширкати ҳавопаймоии «Uzbekistan Airways» ба нақша гирифта шудааст. Лекин билетҳои дараҷаи иқтисодӣ (эконом-класс)  ба ин парвоз аллакай фурӯхта шуда, танҳо блетҳои дараҷаи тиҷорӣ (бизнес-класс) боқӣ мондааст.

Аз Тошканд ҳамчунин рӯзи 3 феврал иҷрои парвоз пешбинӣ шудааст. Арзиши билет дар дараҷаи иқтисодӣ - 1794 сомонӣ ва дараҷаи тиҷорӣ - 3 ҳазору 398 сомониро ташкил медиҳад.

Дар ҳамин ҳол, аз 29 январ ширкати ҳавопаймоии “Сомон Эйр” парвозҳои мунтазамро ба самти Тошканд барқарор мекунад. Парвозҳо дар як ҳафта як маротиба - рӯзҳои ҷумъа сурат мегиранд. Вақти парвоз аз Душанбе - соати 10:30 ва аз Тошканд - соати 13:00 ба вақти маҳаллӣ таъин шудааст

Дар нуқтаҳои фурӯши билетҳо ба “Азия-Плюс” хабар доданд, ки нархи билетҳо ба парвозҳои ширкати “Сомон Эйр” бо хатсайри Душанбе-Тошканд 1809 сомонӣ муқаррар шудааст.

Ёдрас мекунем, ки ҳамаи шаҳрвандони Тоҷикистон, ки хоҳиши сафар бо хатсайри Душанбе-Тошкандро доранд, бояд маълумотномаи гирифтор набудан ба бемории коронавирусро, ки на дертар аз 72 соати пеш аз парвоз ба даст овардаанд, дошта бошанд.

Қобили зикр аст, ки алоқаи ҳавоӣ байни Тошканд ва Душанбе аз 16 марти соли 2020 қатъ шуда, рӯзи 15 январи соли 2021 дар бораи барқарор намудани парвозҳои мунтазам байни кишварҳо қарор қабул шуд.

Айни замон барои равуои шаҳрвандони Тоҷикистону Ӯзбекистон ба қаламрави ҳар ду кишвар тариқи сарҳади заминӣ қисман иҷоза дода шуд. Алҳол барои се категорияи шаҳрвандон: ба касоне, ки дар мактабҳои олии кишварҳо таҳсил мекунанд; касоне, ки дар қаламрави кишвари ҳамсоя ҳамсар ё фарзандонашон ҳузур доранд ва шахсоне, ки аз Ситодҳои ҷумҳуриявии Тоҷикистону Ӯзбекистон иҷозаи хаттии дахлдор доранд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.