Макотиби олии Русия аз 8 феврал ба таҳсили муқаррарӣ бармегарданд. Дар ин робита мо талош варзидем, ки ба масъалаи донишҷӯёни тоҷик, ки дар мактабҳои олии Русия таҳсил мекунанду бар асари пандемия ба ин кишвар рафта наметавонанд, каме равшанӣ андозем.

Вазорати маорифи Русия ба макотиби олии ин кишвар ҷиҳати гузаштан аз таҳсили фосилавӣ ба муқаррарӣ аз 8 феврал иҷоза дода, лекин дар сурати бад шудани вазъи марбут ба эпидемия, онҳо бояд ба барқарор кардани тадбирҳои маҳдудкунӣ омода бошанд.

Масъалаи идомаи таҳсили донишҷӯёни тоҷик дар макотиби олии Русия шояд дар доираи ҷаласаи Комиссияи байниҳукуматии ҳамкории иқтисодии Тоҷикистону Русия, ки рӯзҳои 8-9 феврал дар Маскав баргузор мешавад, роҳи ҳалли худро пайдо кунад.

Вазири маориф ва илми Тоҷикистон Маҳмадюсуф Имомзода зимни нишасти хабарии рӯзи 5 феврал дар ин бора изҳор дошт, ки дар 27 макотиби олии кишварҳои хориҷӣ ҳудуди 40 ҳазор донишҷӯёни тоҷик таҳсил дошта, бо мақомоти марбутаи ин кишварҳо бобати чӣ гуна ба идомаи таҳсил баргаштани онҳо гуфтушунидҳо ҷараён доранд.

Бино ба маълумоти Вазорат, зиёда аз 1800 нафар донишҷӯёни тоҷик, ки дар муассисаҳои таълимии олии Русия таҳсил мекунанд, дар Тоҷикистон дармондаанд, лекин шумори онҳо шояд зиёдтар бошад, чунки 1800 нафар касоне мебошанд, ки дар платфомаи махсуси Вазорат сабт шудаанд.

Тавре ба “Азия-Плюс” роҳбари Раёсати муносибатҳои байнулмилалии Вазорати маориф ва илми Тоҷикистон Илҳом Камолзода хабар дод, айни замон вуруди шаҳрвандони хориҷӣ ба Русия, аз ҷумла донишҷӯён манъ буда, лекин донишҷӯёни дар Тоҷикистон боқимонда таҳсилро фосилавӣ идома медиҳанд ва рейтингу имтиҳонҳоро муваффақона месупоранд.

“Ба донишҷӯёне, ки бо сабабҳои беморӣ, техникӣ ё вазъи оилавӣ дар таълими фосилавӣ (онлайн) иштирок карда наметавонанд, мактабҳои олии Русия гирифтани рухсатии академиро пешниҳод мекунанд, лекин шумори чунин донишҷӯён хеле кам аст, ҳамагӣ ба 10-12 нафар чунин пешниҳод шудааст”, - гуфт Илҳом Камолзода.

Ба гуфтаи ӯ, ба донишҷӯёне, ки дар риштаи тиб ё техникӣ таҳсил мекунанд, низ пешниҳод шудааст, ки рухсатии академӣ гиранд.

“Ба донишҷӯёне, ки барояшон гузаштан аз таҷрибаи тахассусӣ зарур аст, мо омодаем, ки шароит фароҳам оварем, лекин то ҳол чунин муроҷиатҳо нашудааст”, - илова кард ӯ.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.