Бино ба маълумоти Агентии обуҳавошиносии Тоҷикистон, охири ҳафта дар ҷумҳурӣ боришот дар назар аст.

Аз ҷумла рӯзҳои 20-21 март дар Душанбе ҳавои абрнок ва боридани борон, баъзан пуршиддат бо раъду барқ ва жола пешбинӣ мешавад. Ҳарорат ин рӯзҳо 18-20 дараҷа гарм мешавад.

Дар ноҳияҳои тобеи марказ низ ҳамин гуна обуҳаво дар назар буда, лекин дар баъзе ноҳияҳо дар баландии зиёда аз 2000 метр боридани барфу борон аз эҳтимол дур нест.

Рӯзҳои идонаи истироҳат обуҳавошиносон дар вилояти Суғд боридани борон, баъзан пуршиддат ва гармии 15-20 дараҷаи ҳаворо пешгӯйӣ мекунанд.

Ин рӯзҳо дар ВМКБ ҳаво каме сардтар мешавад. Рӯзи 21 март дар Хоруғ ҳавои абрноку боридани борон ва шабона барф пешбинӣ мешавад. Ҳарорат рӯзона 7-9 дараҷа гарм мешавад. Дар ғарби ВМК борон (шабона барф) борида, ҳарорат 4-9 дараҷа гарм ва дар баъзе ноҳияҳои ҷудогонаи шарқи вилоят каме барф борида, ҳарорат рӯзона аз 2 дараҷа хунук то 3 дараҷа гарм мешавад.

Дар Хатлон ҳарорат 19-24 дараҷа гарм шуда, дар он ҷо ҳам тибқи пешгӯйиҳо, борони кӯтоҳмуддат ва раъду барқу жола дар назар аст.

Дар ҳамин ҳол, шабонарӯзи наздик дар ноҳияҳои алоҳидаи кӯҳии НТҶ ва ғарби ВМКБ боридани борон (шабона боришот, борон, барф) дар баъзе ноҳияҳо бошиддат дар назар аст.

Дар давраи рӯзҳои 17-19 март дар ноҳияҳои кӯҳии ҷумҳурӣ фаромадани тарма пешгӯӣ шуда, дар водиҳо ва доманакӯҳҳои вилоятҳои Хатлон, Суғд ва НТҶ фаромадани сел аз эҳтимол дур нест.

Рӯзҳои 18-19 март дар ноҳияҳои алоҳидаи вилояти Суғд вазиши шамол аз самти ғарб бо суръати то 20-25м/с, дар баъзе ҳолатҳо шиддатнок - то 25-30м/с пешгӯйӣ мешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.