Имрӯз, 23 апрел 15 шаҳрванди Тоҷикистон, ки муддати зиёда аз 1 моҳ дар Боздоштгоҳи муваққатии шаҳрвандони хориҷии шаҳри Москва қарор доштанд, ба ватан фиристода мешаванд.

Дар ин бора аз сафорати Тоҷикистон дар Русия хабар доданд.

Дар намояндагии дипломатӣ изҳор доштанд, ки ба ватан фиристодани тоҷикистониён бо хатсайри чартерии ширкати “Сомон Эйр” аз ҳисоби ҷониби Русия сурат мегирад. Масъалаи ба ватан баргардонидани онҳо дар вохӯрии намояндагони сафорат ва Боздоштгоҳи муваққатӣ баррасӣ шуд.

Ба иттилои манбаъ, 21 апрел намояндагони сафорат таҳти сарварии роҳбари Хадамоти консулгарӣ Анвар Ибодзода бо мақсади шиносоӣ бо шароити нигаҳдории шаҳрвандон ба ин боздоштгоҳ воқеъ дар Сахарово рафтанд.

Намояндагони сафорат нахуст бо сардори Боздоштгоҳ Алексей Лагода вохӯрда, масоили анҷоми расмиёти ҳуҷҷатҳои зарурӣ ва ҳарчи зудтар ба ватан фиристодани шаҳрвандони Тоҷикистонро баррасӣ карданд.

Тибқи маълумоти сафорат, айни замон дар боздоштгоҳи мазкур 37 нафар шаҳрванди Тоҷикистон қарор доранд.

“Барои 35 нафари онҳо аз ҷониби Хадамоти консулгарӣ бепул Шаҳодатнома дар бораи бозгашт ба ватан таҳия шуд. Барои боқимонда 2 шаҳрванди дигар дар робита ба надоштани ҳуҷҷатҳои тасдиқкунандаи шахсият, ба мақомоти дахлдори Тоҷикистон ҷиҳати муайян кардани шахсияти онҳо дархост фиристода шуд. Пас аз ҷамъоварии ҳуҷҷатҳои зарурӣ ин шаҳрвандон низ ба Тоҷикистон баргардонида мешаванд”, - хабар доданд аз сафорат.

Сипас кормандони сафорат бо шаҳрвандони Тоҷикистон суҳбат карда, ба саволу дархостҳои онҳо посухҳои мушаххас ва машваратҳои ҳуқуқӣ доданд.

“Ба шаҳрвандон меъёрҳои асосии қонунгузории Русия дар соҳаи муҳоҷирати корӣ шарҳу тавзеҳ дода шуд”, - гуфтанд дар намояндагии дипломатӣ.

Ба муносибати моҳи шарифи Рамазон барои шаҳрвандони кишвар, ки дар ин ҷо ҳузур доранд, маводи хӯрокворӣ, сарулибос ва дигар маҳсулоти мавриди ниёз тақдим карда шуд.

Дар сафорат зикр карданд, ки дар дигар минтақаҳои Русия низ онҳо бо мақсади шиносоӣ бо шароити нигаҳдории шаҳрвандон, анҷоми расмиёти ҳуҷҷатҳои зарурӣ ва ҳарчи зудтар ба Тоҷикистон фиристодани онҳо, ба ин монанд чорабиниҳо баргузор мекунанд.

Қобили зикр аст, ки дар чунин боздоштгоҳҳо асосан шахсоне, ки ҳуҷҷат надоранду қоидаҳои будубошро дар Русия риоя накардаанд ва бояд ихроҷ шаванд, инчунин касоне, ки муҳлати адои ҷазояшон дар муассисаҳои ислоҳӣ ба охир расидааст, нигаҳдорӣ мешаванд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.