Сохтмони иншооти зикршуда ҳанӯз соли 2010 оғоз ёфта, бино ба маълумоти пешакӣ шояд зимни сафари навбатии президент, ки 27 октябр ба шаҳри Бохтар дар назар аст, мавриди истифода қарор дода шавад.
Рӯзи 18 августи соли 2010 дар рӯзи иди касбии кормандони соҳаи тандурустӣ собиқ раиси вилояти Хатлон Ғайбулло Афзалов аз оғози сохтмони Маркази ташхисию табобатии бемориҳои дил хабар дода буд.
“Мо солҳои зиёд дар фикри сохтмони чунин як марказ будем, зеро дар вилояти Хатлон Маркази замонавии ташхисию табобатии бемориҳои қалб надорем. Барои оғози корҳои сохтмон 300 ҳазор сомонӣ дар соли равон пешбинӣ шудааст”, - гуфта буд раиси вақти вилоят.
Аммо раиси баъдии вилоят Давлатшо Гулмаҳмадзода дар як нишасти матбуотияш гуфта буд, ки ҷое, ки барои сохтмони Маркази ташхисию табобатии бемориҳои дил пешбинӣ шудааст, номувофиқ аст.
“Ҷое, ки барои сохтмони маркази ташхисию табобатии бемриҳои қалб пешбинӣ шудааст, дар маркази шаҳр, наздики роҳи мошингард ва наздики корхонаи пахтатозакунӣ воқеът, ки ҳам ноором ва ҳам обуҳавояш номувофиқ аст. Барои чунин марказ бояд як ҷои орому хушобу ҳавое бошад”,- гуфта буд Д.Гулмаҳмадзода.
Бояд ёдовар шуд, ки ҳамон замон мувофиқи лоиҳа арзиши сохтмони ин объект 8,5 млн сомонӣ ҳисоб шуда буд.
Аммо тайи се сол, яъне солҳои 2015, 2017 ва 2018, ин лоиҳа маблағгузорӣ нашуд. Мувофиқи маълумоти Сарраёсати молияи вилоят, соли 2016 барои идомаи корҳои сохтмон дар иншооти мазкур зиёда аз 1 млн сомонӣ, соли 2019 - 332 ҳазор сомонӣ, соли 2020 - 3,5 млн сомонӣ ва соли 2021 - 2 млн сомонӣ маблағгузорӣ шудааст. Дар маҷмӯъ, барои пурра ба истифода додани ин бино 9,5 млн сомонӣ маблағ сарф шудааст.
Ҳамчунин аз Сарраёсати молияи вилояти Хатлон хабар доданд, ки ин бино дар рӯйхати объектҳои сохташаванда то ба имрӯз ҳамчун сохтмони Маркази ташхисию табобатии бемориҳои қалб нишон дода шудааст. Ин нақша бо қарори раиси вилоят ва бо розигии вазири иқтисод ва савдо тасдиқ карда мешавад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
Руcский