Дар ноҳияҳои кӯҳӣ ва пойтахти Тоҷикистон рӯзҳои 17-18 ноябр якуякбора ноустуворшавии вазъи обуҳаво ва боридани борон бо гузариш ба барфи тар дар назар аст.

Бино ба иттилои Агентии обуҳавошиносии ҷумҳурӣ, сарфи назар аз ҳавои офтобии имрӯза дар пойтахт, аллакай пагоҳ бориши борон бо гузариш ба барфи тар ва дар баъзе ҳолатҳо бошиддат ба амал меояд. Шиддатёбии вазиши шамол бо суръати то 10-15м/с дар назар буда, ҳарорати рӯзонаи ҳаво 5-7 дараҷа гарм мешавад.

Гуфта мешавад, ин рӯзҳо дар саросари кишвар обуҳавои ноустувор, боришот, дар водиҳо боридани борон ба гузариш ба барфи тар ва дар кӯҳҳо боридани барф пешгӯйӣ мешавад.

Дар баъзе ноҳияҳо баъзан тормеғ (туман) фаромада, ҳарорати рӯзона 10-12 дараҷа поин меравад.

Дар ҳамин иртибот Кумитаи ҳолатҳои фавқулодаи ҷумҳурӣ аз шаҳрвандон хоҳиш мекунад қоидаҳои бехатарии сӯхторро риоя намоянд. Ҳангоми истифодаи асбобҳои гармидиҳандаи барқӣ, бахусус асбобҳои барқии гармидиҳандаи худсохт эҳтиёт кунанд. Аз истифодаи бухориҳо низ баэҳтиёт бошанд, ҳамеша дудбарои хонаҳоро хабар гиранд ва онҳоро тоза нигоҳ доранд.  Кӯдакон танҳо ва беназорат гузошта нашаванд.

КҲФ бо мақсади пешгирии садамаҳои нақлиётӣ аз аҳолӣ хоҳиш мекунад, ки ҳангоми истифодаи роҳҳои кӯҳӣ эҳтиёткор бошанд, воситаҳои нақлиётии худро аз қабл ба сафар омода созанд, то ҳадди имкон аз рафтан ба минтақаҳои хатарнок худдорӣ намоянд, ҳангоми иҷрои корҳои кишоварзӣ дар доманакӯҳҳо ва навоҳии кӯҳистонӣ, аз чаронидани чорво дар чарогоххои куҳӣ муваққатан худдорӣ намоянд. Дар ин гуна рӯзҳо рафтан ба кӯҳҳову доманакӯҳҳо барои ҷамъоварии ҳезум ва моҳидорӣ дар соҳили наҳру кӯлу рӯдхонаҳо метавонад хатарнок бошад.

Дар ҳолати рух додани ҳолатҳои ғайримуқаррарӣ ё ҳолати фавқулодда ба рақами 112  ва ё ба Қисми навбатдории  Кумитаи ҳолатҳои фавқулодда: 223 13 11 ё 93 880 28 19 занг занед.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.