Дар ҳудуди шаҳри Панҷакент бостоншиносон тавонистанд осори навро аз муҷассамаи Амир Хуросон Санҷаршоҳ пайдо кунанд. Бостоншиносон дар натиҷаи ҳафриёт ҳуҷрае пайдо кардаанд, ки мутаалиқ ба давраи якуми сохтмонӣ (қарни VIII мелодӣ) буда, таърихи 1200-сола доранд.

Инҳо намунаҳои беназири ҳунарҳои кандакориҳои нодире мебошанд, ки аз сӯхтор осеб дидаанд. Ба гуфтаи  бостоншиносон андозаи ҳуҷраи пайдошуда дар давраи якуми сохтмонӣ ба  13.5 x 13.8 метр мерасад.

Абдураҳмон Пӯлотов, раиси фонди амниятии Осорхонаи миллии бостонии Тоҷикистон ба хабаргузории давлатии Ховар гуфтааст, ки "осори дарёфтшуда хеле нодир буда, ба фарҳанги бостонӣ рӯшании изофӣ мебахшад".

«Муҷассамаи Санҷаршоҳ дар Панҷакент қалби ҳамин гуна ашёҳост, ки аз маҳорат, шавқу ҳаваси меъморӣ ва кулолгарии сокинони болооби водии Зарафшон дар ибтидои асрҳои миёна дарак медиҳад",- гуфтааст Пӯлотов.

Қобили зикр аст, ки нахустин муҷассамаи асримиёнагии Санҷаршоҳ дар рустои Суҷина, 12 км шарқтар аз шаҳри Панҷакент (вилояти Суғд) ҷойгир буда, мутааллиқ ба асрҳои 5-9 мелодӣ мебошад.

«Новабаста аз он ки қисми зиёди ёдгориро солҳои 1950-ум ва 1970-уми асри гузашта бо мақсади бунёди боғ масъулини онвақтаи деҳаи Суҷина ҳамвор кардаанд, бостоншиносон дар талоши равшан намудани асрори зери он нуҳуфта ҳастанд.  То имрӯз дар ҳудуди ёдгорӣ 8 соҳаи бостонӣ таҳқиқ шудааст, ки дар натиҷа барои дарки сохтори шаҳрак, ҳунар ва фарҳанги моддии он маводи пурқимати таърихӣ ба даст омадаанд», - гуфтааст Пулотов ба "Ховар". 

Гуфта мешавад, ки ин қаср солҳои 740-ум сохта шуда, дар сӯхтори азими солҳои 770-780 хароб гардидааст.  Муҳимтарин натиҷаҳои ин мавсим пораҳои деворнигораҳо ва пораҳои чӯби кандакоришудаи он мебошанд. Сарфи назар аз он, ки аксари ёдгориҳо дар солҳои 50-70-ум кашф шуда буданд, олимон то ҳол дар ин макон ҳафриётҳоро барои бозёфти осори нави таърихӣ идома медиҳанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.