Рӯзи 22 апрел дар Ереван гирдиҳамойии даҳҳо ҳазор нафар зидди собиқ президенти Арманистон Серж Саргсян баргузор шуд, менависад нашрияи Meduza. Рӯзи 17 апрел ӯ нахуствазир интихоб шуд.

Бино ба маълумоти мақомоти пулис, дар гирдиҳамойӣ 35 ҳазор нафар ширкат варзидаанд. Мухолифон бошанд, аз иштироки 160 ҳазор нафар маълумот медиҳанд. Ин гирдиҳамойӣ сершумортарин тӯли 10 рӯзи эътироз алайҳи Саргсян арзёбӣ мегардад. Эътирозгарон собиқ президентро ба идоракунии бесамари иқтисод гунаҳкор медонанд.

Ба ин эътироз вакили парлумон, роҳбари фраксияи мухолифи «Елк» Никол Паршинян роҳбарӣ мекунад. Баъди гуфтушунидҳои нобарор бо Саргсян ӯ аз ҷониби пулис боздошт шуда, сарфи назар аз ин, эътирозҳо дар Ереван бузургмиқёстар шуданд.

Дар Ереван аз 13 апрел эътирозҳои тарафдорони мухолифон, ки зидди таъини собиқ президент Серж Саргсян ба мансаби нахуствазир мебошанд, идома дорад. Мавҷи нави эътирозҳо баъди интихоби Саргсян ба вазифаи нахуствазир рӯзи 17 апрел шурӯъ шуд. Ин рӯз дар парлумони Арманистон бори нахуст баъди ислоҳот интихоби нахуствазир баргузор шуд.

Дар натиҷаи ислоҳоти конститутсионии соли 2015 дар Арманистон, ин кишвар аз идоракунии президентӣ ба парлумонӣ гузашта, ваколатҳои нахуствазир зиёд шуданд, акнун нақши асосиро маҳз нахуствазир ба даст мегирад.

Серж Саргсян солҳои 2008-2018 ба ҳайси президенти Арманистон ва солҳои 2007-2008 ба сифати нахуствазир фаъолият кардааст. Ваколати дуюми президентии ӯ 9 апрели соли равон ба итмом расид. Мувофиқи Констутитусияи Арманистон, як нафар на бештар аз ду муҳлат вазифаи президентиро ишғол карда метавонад. Дар ҳамин ҳол, ба вазифаи нахуствазирӣ шахс метавонад бе маҳдудият чандин маротиба интихоб шавад.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.