Дар Нигер, як кишвари африқоӣ, пас аз чанд рӯзи муҳосираи президент дар қароргоҳаш, гуруҳи низомиён тавассути телевизиони давлатӣ эълон карданд, ки президенти кишвар Муҳаммад Базум аз мансаб барканор карда шуд. Онҳо ҳамчунин гуфтанд, ки сарҳад баста ва дар кишвар қуюди шабгардӣ ҷорӣ шудааст.

Расонаҳо менависанд, ки табаддулотгарон афсарону аскарони Горди президентӣ мебошанд. Онҳо роҳҳои наздик шудан ба қароргоҳи президентро баста, баъди гуфтугуҳо ба Базум иҷозаи берун рафтанро надодаанд.

Таъкид мешавад, ки президент Базум тасмим дошт, фармондеҳи горди президентӣ генерал Умар Тчианиро барканор кунад. Ба иттилои пешакӣ, ин тасмим метавонад сабаби шӯриш бошад.

Дастгоҳи президент гуфт, ки табаддулоти мазкурро артиши кишвар ҷонибдорӣ накардааст.

Муҳаммад Базум соли 2021 президенти Нигер интихоб шуд. Ӯ қаблан вазири корҳои дохилӣ ва корҳои хориҷии ин кишвар буд.

Нигер як давлати африқоиест, ки солҳои пеш мустамликаи Фаронса буд ва дорои захираҳои зиёдӣ табиӣ мебошад.

Дар Telegram, Facebook, Instagram, OK ва ВК бо мо бимонед.