Имсол чемпионати 33-юми Тоҷикистон оид ба футбол байни дастаҳои Лигаи олии кишвар 6 апрел оғоз гардида, мисли ду соли охир дар ду давр баргузор мешавад.
Дастаҳо дар 2 давр дар майдони худ ва меҳмонӣ бо ҳам вомехӯранд. Умуман, дар мавсим ҳар як тим 22 вохӯрӣ мегузаронад.
Дастаҳо аз 10 то 12-то зиёд шуданд
Қаблан тасмим гирифта шуд, ки шумораи иштирокчиёни Лигаи олӣ аз 10 ба 12-то зиёд мешавад. Бар асоси натоиҷи раванди литсензиякунонӣ (иҷозатномадиҳӣ)-и бошгоҳҳо маълум шуд, ки дастаи «Файзканд»-и Восеъ ба далели мушкилоти молӣ ва инфрасохторӣ дар мусобиқоти қаҳрамонии Тоҷикистон-2024 ширкат карда наметавонад.
Дастаи ноҳияи Восеъро дар лигаи олии кишвар барандаи медали биринҷии лигаи якуми мавсими гузашта «Барқчӣ»-и Ҳисор, ки аз расмиёти литсензиякунонӣ бомуваффақият гузаштааст, иваз мекунад.
Ғайр аз ин, бинобар ба 12 адад расидани шумори дастаҳо дар Чемпионати Тоҷикистон-2024 дастаҳои «Регар-ТадАЗ»-и Турсунзода ва «Вахш»-и Бохтар баромадро дар лигаи олӣ идома хоҳанд дод, зеро ин бошгоҳҳо ба талаботи чемпионат ҷавобгӯ буда, бомуваффақият аз иҷозатномадиҳӣ гузаштаанд.
Дастае, ки дар мавсими соли 2024-и лигаи олӣ мақоми охиринро ишғол мекунад, ба лигаи якум меравад ва бошгоҳе, ки дар чемпионат ҷойи ёздаҳумро мегирад, бо барандаи медали нуқраи лигаи якуми Тоҷикистон-2024 бозиҳои гузаришӣ доир мекунад.
Ҳайати иштирокчиёни Чемпионати футболи Тоҷикистон-2024:
«Истиқлол» (Душанбе)
«Равшан» (Кӯлоб)
«Эсхата» (Хуҷанд)
«Кӯктош» (ноҳ. Рӯдакӣ)
КМВА (Душанбе)
«Хуҷанд» (Хуҷанд)
«Ҳосилот» (Фархор)
«Регар-ТадАЗ» (ш.Турсунзода)
«Вахш» (Бохтар)
«Панҷшер» (ноҳ. Ҷалолиддини Балхӣ)
«Истаравшан» (Истаравшан)
«Барқчӣ» (Ҳисор).
Арзиши дастаҳои футболи Тоҷикистон
Портали Transfermarkt, ки арзиши футболбозонро баҳогузорӣ мекунад, маълумот дар бораи дастаҳои Тоҷикистонро нав кард.
Нархҳои умумии дастаҳои лигаи олии кишвар каме тағйир ёфтанд. Қобили зикр аст, ки дар маълумоти портал дастаҳои лигаи олии Тоҷикистон зикр шудаанд, лекин на ҳамаашон.
Лигаи олии футболи Тоҷикистон нисбат ба навсозии пешинаи нархҳо дар умум гаронтар шудааст. Арзиши умумии дастаҳои чемпионати Тоҷикистон 12,14 млн евроро ташкил додааст. Қаблан он ба 12 млн евро баробар буд.
Дар 12 дастаи Лигаи олии Тоҷикистон 281 футболбоз бозӣ мекунанд, ки 79 нафарашон легионерҳо (футболбозони хориҷӣ) мебошанд. Синни миёнаи лига ба 25,5 сол баробар аст.
Дастаҳои Лигаи олии Тоҷикистон тариқи зайл нархгузорӣ шудаанд: 1) «Истиқлол» - 6,30 млн евро (қаблан 5,08 млн евро); 2) «Равшан» - 2,21 млн евро (қаблан - 2,60 млн); 3) «Эсхата» – 1,15 млн евро (қаблан – 250 ҳазор евро); 4) «Ҳосилот» - 800 ҳазор евро (қаблан - 350 ҳазор евро); 5) «Истаравшан» - 550 ҳазор евро; 6) «Вахш» – 450 ҳазор евро (қаблан 900 ҳазор евро); 7) КМВА (ЦСКА) - 250 ҳазор евро (қаблан - 375 ҳазор евро); 8) «Регар-ТадАЗ» – 225 ҳазор евро (қаблан – 675 ҳазор евро); 9) «Хуҷанд» - 200 ҳазор евро (қаблан - 3,41 млн. евро); 10) «Кӯктош» - 50 ҳазор евро.
Ду зинаи охирро “Панҷшер” ва “Барқчӣ” ишғол намуданд, ки арзишашон баҳогузорӣ нашудааст.
11 футболбози гаронтарин
Бозингарони Лигаи олии Тоҷикистон, ки ба мунтахаби рамзии гаронтаринҳо дохил гардиданд, маълум шуданд.
Аз рӯи натиҷаҳои маълумоти навшуда 11 футболбози гаронтарин инҳоянд:
Ёдрас мекунем, ки давраи бақайдгирии зимистон, ки дар давоми он дастаҳои Тоҷикистон метавонистанд гузариши футболбозонро ба расмият дароранд, ба охир расидааст.
Қобили зикр аст, ки барои иштирок дар чемпионат ҳамаи дастаҳо ӯҳдадоранд, ки маблағи аъзоҳаққӣ пардохт кунанд, ки талаботи ФИФА аст. Имсол он барои дастаи Лигаи олӣ 80 ҳазор сомонӣ ва Лигаи якум - 40 ҳазор сомониро ташкил медиҳад. Ба ивази он бояд ба дастаҳо кумак расонида шавад.
Легионерҳои чемпионат
Дар чемпионати нав дастаҳои лигаи олии кишвар 63 бозингари хориҷӣ (легионерҳо)-ро аз 17 кишвар даъват кардаанд.
Бештари легионерҳо аз кишварҳои зерин мебошанд: Гана - 15 нафар; Камерун - 14 нафар ва Ӯзбекистон - 13 нафар.
Мувофиқи регламенти чемпионати Тоҷикистон, дастаҳои лигаи олӣ то 7 легионер даъват карда метавонанд, лекин дар майдон дар як вақт ба бозии 5 легионер иҷоза шудааст.
Ҷадвали бозиҳои даври 1-уми чемпионат:
6 апрел (шанбе)
«Хуҷанд» – «Эсхата»
«Регар-ТадАЗ» – «Вахш»
«Барқчӣ» – «Равшан»
7 апрел (якшанбе)
«Ҳосилот» – «Кӯктош»
«Истиқлол» – «Истаравшан»
«Панҷшер» – КМВА (ЦСКА).
Ҷадвали пурраи Чемпионати футболи Тоҷикистон-2024 миёни дастаҳои Лигаи олӣ дар сомонаи Федератсияи футболи Тоҷикистон қобили дарёфт аст.
Руcский