Дар назди пояи муҷассамаи ҷанговари итернатсионалист, Қаҳрамони Иттиҳоди Шӯравӣ Александр Мироненко ва мактаби №37-и шаҳри Душанбе, ки ӯ дар он таҳсил кардааст, бахшида ба солгарди хурӯҷи нерӯҳои низомии шӯравӣ аз Афғонистон (15 феврали соли 1989) чорабиниҳо доир гардиданд.
Сарфи назар аз борон, аз субҳ назди ҳайкал даҳҳо нафар - ҷанговарони интернатсионалист, курсантҳои омӯзишгоҳҳои низомӣ, хизматчиёни ҳарбии қисмҳои низомии Тоҷикистон ва пойгоҳи низомии 201-уми Русия ҷамъ омаданд.
Оркестри нафасии Вазорати мудофиаи ҷумҳурӣ суруду оҳангҳои солҳои ҷангиро ба иҷро расонида, курсантҳои омӯзишгоҳҳои ҳарбӣ ба сифати қаровули фахрӣ дар роҳравҳо ба муҷассама саф оростанд. Ҷанговарони интернатсоналист ба пояи муҷассама гулҳо гузоштанд.
Дар фарҷоми маросим ҷанговарони интернатсионалисти пойтахт ва дигар минтақаҳои кишвар бо меҳмонон - иштирокчиёни маросим аксбардорӣ намуда, бо ҳамсафони худ хотираҳои солҳои хизмати ҳарбиро дубора варақгардон карданд.
Чорабинӣ дар маҷлисгоҳи мактаби рақами 37-и ба номи Александр Мироненко идома ёфта, дар он ҷо ба ҳозирин лавҳаи ёдбуд бо номи Мироненко муаррифӣ шуд, ки дар намо (фасад)-и бинои мактаб гузошта мешавад.
Тибқи маълумотҳо аз манбаъҳои гуногун, давоми ҷанг дар Афғонистон беш аз 15 ҳазор нафар шаҳрвандони Иттиҳоди Шӯравӣ ҳалок, зиёда аз 53 ҳазор нафар маҷрӯҳ ва 417 нафар бедарак шуданд.
Ба ин ҷанг аз Тоҷикистон 15 ҳазор нафар сарбозу афсарон сафарбар шуда, 336 нафари онҳо ҳалок, 5 тан бедарак ва беш аз 1100 тан маҷрӯҳ гардиданд, ки бисёре аз онҳо маъюб шуданд. Панҷ нафар аз тоҷикистониёни дар ин ҷанг иштироккарда ба унвони Қаҳрамони Иттиҳоди Шӯравӣ шарафёб гардиданд.
Руcский