Дирӯз, 1-уми июл, як мошини оташнишонӣ дар ҳудуди шаҳри Норак ба садама дучор шуда, бар асари он як шаҳрванд ҷон бохтааст. Дар ин бора Ориф Нозимиён, сухангӯи Кумитаи ҳолатҳои фавқулода (КҲФ) ба “Азия-Плюс” иттилоъ дод.

Ба гуфтаи ӯ, садама тақрибан соати 12:00 дар ҳудуди деҳаи Тутқавули ҷамоати деҳоти Пули Сангини шаҳри Норак рух додааст.

“Автомашинаи оташнишонии тамғаи DFAC ба Хадамоти давлатии отошнишонӣ дар шаҳри Норак тааллуқ дошт. Ронандаи он Хуршед Раҷабзодаи 33-сола, сокини шаҳри Норак, зимни ҳаракат аз сӯйи Данғара ба ҷониби Норак аз ӯҳдаи идораи автомашина набаромада, дар нишебии канори роҳ ба садама дучор шудааст”, - гуфт ҳамсуҳбати мо.

Сухангӯи КҲФ гуфт, бар асари садама худи ронанда ҷароҳати вазнин бардошта, ба бемористон интиқол дода шудааст. Аммо шаҳрванд Мақсадхон Бӯриеви 41-сола, сокини шаҳри Ваҳдат, ки дар дохили мошини оташнишонӣ будааст, ҷон бохтааст.

Маълум нест, ки шаҳрванд Мақсадхон Бӯриев дар дохили он чӣ кор мекард.

Бояд гуфт, ки дирӯз навори мошини оташнишонӣ, ки ба садама дучор шудааст, дар шабакаҳои иҷтимоӣ нашр гардид.

Ин ҳодиса аз камтарин сонеҳаҳои маргбор аст, ки бо мошини оташнишонӣ ба вуҷуд меояд. Одатан, мошинҳои оташнишонӣ бо садои бонги хатар имкон доранд, ки ҳаракати ҳама гуна нақлиётро бурида, ба макони ҳодиса расанд. Ин садои бонг бартариест, ки мошинҳои оташнишонӣ камтар ба садама дучор шаванд.

Дар Telegram, Facebook ва Instagram бо мо бимонед.