Мавсими сайёҳии касбӣ – фурсати фатҳи қуллаҳои осмонбӯси Тоҷикистон фаро расид. Аввал кӯҳнавардон ба лагери ибтидоии Tajik Peaks, воқеъ дар майдони “Москвин” интиқол мешаванд. Инҷо ҷисми худро ба иқлими хос мутобиқ месозанд. Ва баъд ба фатҳи қуллаҳо шурӯъ мекунанд.

Дар лагери Tajik Peaks фазои хос ҳукмфармост. Фишори атмосферӣ дар ин баландӣ паст аст, аз ин рӯ ҳаво сабук буда, одам зуд-зуд нафас мекашад. Ҳаво бошад, рӯзона ҳамагӣ 10-14 дараҷа гарм буда, шабона аз сифр поён мефарояд. Гирду атроф бо барфҳои чандинсола пӯшида шудааст. Ва ҳамаи ин сайёҳонро мафтун мекунад.

Тазодди аҷиб – дар пасманзари ин фазои тунд бошишгоҳи муосире ҷой гирифтааст. Он бо ҳама шароитҳои лозимӣ муҳайё аст - рахтҳои хоби бароҳат, ошхона, ҳаммом, оби ошомиданӣ ва ҳатто барқу интернет. Бошишгоҳ ё лагерро чанд сол пеш ширкати Tajik Peaks бунёд намудааст.

Аз ин макон қуллаҳои “Душанбе”, “Озодӣ”, Ибни Сино ва ҳамчунин, қуллаи Исмоили Сомониро фатҳ кардан мумкин аст. Баландии Исмоили Сомонӣ 7495 метр буда, баландтарин қулла дар минтақаи пасошуравӣ аст.

Кӯҳнавардон аз тамоми дунё моҳҳо интизор мешаванд, то қуллаҳои баландтаринро фатҳ кунанд. Мавсим хеле кӯтоҳ аст: ҳамагӣ ду моҳ – июл ва август. Мо аввалин сайёҳонро гусел кардем. Дар пеш бошад чандин гурӯҳҳои дигар интизори сафаранд.

Дар Telegram, Facebook ва Instagram бо мо бимонед.