Дар шаҳри Гуаякили Эквадор Чемпионати ҷаҳон миёни ҷавонон ҷараён дорад. Намояндаи Тоҷикистон - Нуралӣ Эмомалӣ дар вазни -66кг соҳиби медали тилло шуд. Дар ин бора Федератсияи ҷудои Тоҷикистон хабар медиҳад.

Ба итилои манбаъ, Нуралӣ Эмомалӣ дар даври якум бо варзишгари Италия, дар даври дуюм муқобили ҷудокори фаронсавӣ ва дар чорякниҳоӣ рақибаш аз Туркия – Муҳаммад Демирелро шикаст дода ба даври нимниҳоӣ роҳ ёфт.

Гуфта мешавад, ки дар даври ниманиҳоӣ Нуралӣ Эмомалӣ бо Извореану Раду аз Молдова қувваозмоӣ карда ӯ ро бо се танбеҳ шикаст додааст.

Дар қувваозмоиии ниҳоӣ Нуралӣ бо ҷудокори Ӯзбекистон, Қаҳрамони феълии Осиё байни ҷавонон - Азизбек Ортиқов зӯрозмоӣ карда, пирӯз гаштааст.

Сурат: Федератсияи ҷудои Тоҷикистон

Баробари дарёфти медали тилло, Нуралӣ Эмомалӣ соҳиби 700 имтиёз ва ҷоизапулӣ дар хаҷми 2000 доллар шуд.

Бояд гуфт, ки дар таърихи ҷудои тоҷик ин дуюмин нишони тилло аз Қаҳрамониҳои ҷаҳон миёни ҷавонон маҳсуб мешавад. Нахустин медали тиллоро Сомон Маҳмадбеков дар вазни -73кг октябри соли 2019 дар Қаҳрамонии ҷаҳон дар Марокаш ба даст оварда буд.

Зимнан, имрӯз дар вазни -73кг ҷудокори дигари кишвар - Масъуди Аҳмадзод ҳунарнамоӣ мекунад. Оғози рақобатҳо - соати 21:30 бо вақти Душанбе.

Дар Telegram, Facebook, Instagram, OK ва ВК бо мо бимонед.