Роҳбари Кумитаи тадорукоти Бозиҳои олимпӣ дар Париж Тони Эстанге ба унвони президенти Тоҷикистон нома ирсол намуда, дар он барои хатогӣ дар маросими ҷоизасупорӣ ба муштзанон дар вазни то 92 кг узрхоҳӣ кард.

Муштзани тоҷик Давлат Болтаев дар Бозиҳои олимпӣ ба дарёфти медали биринҷӣ шарафёб гардид. Дар маросими ҷоизасупорӣ ба ҷойи парчами Тоҷикистон парчами Таиланд боло бардошта шуд.

Сеюм бояд парчами Тоҷикистон барафрохта мешуд
Намогирифт аз видео дар шабакаҳои иҷтимоӣ

“Кумитаи тадорукоти Бозиҳои олимпии Париж-2024 самимона аз ҷаноби Болтаев, Кумитаи миллии олимпии Тоҷикистон ва халқи Тоҷикистон маъзарат мехоҳад. Мо комилан мефаҳмем, ки ба хатогӣ роҳ дода шуд ва амиқан аз ин изҳори таассуф мекунем”, - омадааст дар хабари сомонаи Кумитаи тадорукот.

Номаи роҳбари Кумитаи тадорукоти Бозиҳои олимпии Париж ба президенти Тоҷикистон Эмомалӣ Раҳмон

Дар ҳамин ҳол, рӯзи 11 август дар варзишгоҳи “Стад де Франс” маросими пӯшидашавии Бозиҳои олимпӣ баргузор шуд. Дар ин маросим президенти Фаронса Эмммануэл Макрон, президенти Кумитаи байнулмилалии олимпӣ Томас Бах ва роҳбари УЭФА Ҷанни Инфантино ҳузур доштанд. Дар ин бора ВВС хабар медиҳад.

Пас аз шоуи пуршукӯҳ, ки дар он овозхонҳои маъруф Билли Айлиш, гурӯҳи роки амрикоии Red Hot Chili Peppers, рэпсаро Снуп Догг ва ҳунарманд (актёр) Том Круз) ширкат варзиданд, шаҳрдори Париж Анна Идалго парчами олимпиро ба шаҳрдори Лос-Анҷелес Карен Басс супурд. Бозиҳои олимпии тобистона соли 2028 дар ҳамин шаҳр баргузор мешаванд.

Маросими пӯшидашавии Бозиҳои олимпии Париж-2024
Сурат: © Sarah Meyssonnier Reuters

Аз рӯи натиҷаҳои Бозиҳои олимпии Париж-2024 дар ҳисоби умумидаставӣ тибқи медалҳои дарёфтшуда зинаи аввалро ИМА- 40 медали тилло, 44 нуқра ва 42 биринҷӣ ишғол кард. Дар панҷгонаи пешсафон Чин (40, 27, 24), Ҷопон (20, 12, 13), Австралия (18, 19, 16) ва Фаронса (16, 25, 22) қарор доранд.

Миёни дастаҳои минтақаи Осиёи Марказӣ мунтахаби Ӯзбекистон дар сафи пеш қарор дошта, намояндагони ин кишвар 13 медал - 8 тилло, 2 нуқра ва 3 биринҷӣ ба даст оварданд. Дар идома Қазоқистон - 1 тилло, 3 нуқра ва 1 биринҷӣ, Қирғизистон - 1 тилло ва 3 нуқра ва Тоҷикистон - 3 биринҷӣ қарор доранд. Туркманистон аз медалҳои олимпӣ бенасиб монд.

Тоҷикистонро дар Бозиҳои олимпии Париж 14 варзишгар намояндагӣ карданд. Сомон Маҳмадбеков ва Темур Раҳимов дар риштаи варзиши ҷудо ва Давлат Болтаев дар муштзанӣ ба дарёфти медалҳои биринҷӣ шарафёб гардиданд.

Дар Telegram, Facebook ва Instagram бо мо бимонед