Вохӯрии вазири тандурустӣ ва ҳифзи иҷтимоии аҳолии ҶТ Насим Олимзода бо сафирон ва намояндагони созмонҳои байнулмилалӣ дар Тоҷикистон ҷиҳати баррасии масъалаи коронавирус имрӯз дар Душанбе доир гардид. 

Насим Олимзода иброз дошт, ки масъалаи пешгирии сирояти коронавирус зери назорати бевоситаи раисҷумҳури Тоҷикистон Эмомалӣ Раҳмон қарор дорад.

Инчунин таъкид гардид, ки вазорат ҳамарӯза оид ба вазъи сирояти коронавирус дар тамоми ҷаҳон аз Ташкилоти умумиҷаҳонии тандурустӣ маълумот ба даст меоварад.

Иттилоъ дода шуд, ки то ба имрӯз 1500 нафар шаҳрвандони аз Ҷумҳурии Мардумии Чин, Кореяи Ҷанубӣ, Италия, Афғонистон ва Эрон ба Тоҷикистон воридшударо ба карантин фаро гирифтанд. Аз ин шумор то 4-уми март 320 кас дар ҳолати карантинӣ қарор дошта, боқимонда ба хонаҳояшон рухсат дода шуданд.

Дар ин вохурӣ сафирон ва намояндагони сафоратҳои кишварҳои хориҷӣ, созмонҳои байнулмилалӣ дар Тоҷикистон, аз ҷумла Русия, Фаронса, Афғонистон, Олмон, Арабистони Саудӣ, Беларусия, Ҷумҳурии Мардумии Чин, Ҳиндустон, Эрон, Ҷопон, Қазоқистон, Қирғизистон, Ӯзбекистон, Покистон, Қатар, Туркманистон, Туркия, Британияи Кабир, Украина, ИМА, Корея, Иттиҳоди Аврупо, САҲА, СММ ва Фонди Оғохон дар Тоҷикистон иштирок доштанд.

Тибқи иттилои вазорати тандурустӣ ва ҳифзи иҷтимоии аҳолии ҶТ, дар идомаи вохурӣ намояндагони баъзе сафоратхонаҳо вобаста ба вазъи шаҳрвандони кишварҳои худ пурсон шуданд, ки онҳоро дар Тоҷикистон ба карантин фаро гирифтаанд. Вобаста ба ин масъала иттилоъ дода шуд, ки дар беморхонаҳои сироятии мамлакат барои он нафароне, ки ба карантин фаро гирифта мешаванд, тамоми шароит ва имконоти мусоид фароҳам оварда шудааст.

Айни замон танҳо шаҳрвандоне, ки аз 5 кишвар: Ҷумҳурии Мардумии Чин, Кореяи Ҷанубӣ, Италия, Афғонистон ва Эрон ба Тоҷикистон ворид мегарданд, ба карантин фаро гирифта мешаванд.
Қобили зикр аст, ки айни ҳол аз Афғонистон ба Тоҷикистон молу маҳсулот ворид карда мешавад. Танҳо қабл аз вуруд ба хоки Тоҷикистон нақлиётро дезинфексия мекунанд.
1/3

Ҳамзамон қайд карда шуд, ки бо мақсади пешгирии сирояти коронавирус дар сатҳи ҳукумати Тоҷикистон, вазорати тандурустӣ ва ҳифзи иҷтимоии аҳолии ҶТ ва дигар сохторҳои марбутаи кишвар ситоди корӣ фаъолият дорад.

Дар идомаи вохӯрӣ сафирон ва намояндагони созмонҳои байнулмилалӣ дар Тоҷикистон ба суолҳои худ аз роҳбарияти вазорат посух гирифтанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.