Дар ду моҳи гузаштаи октябр ва ноябри имсол ҳаҷми додугирифт миёни Эрон ва Тоҷикистон аз 60 то ба 180 миллион доллари амрикоӣ афзоиш ёфтааст. Дар ин бора Меҳдӣ Сафарӣ, муовини вазири хориҷии Эрон дар мусоҳиба бо ширкати Садо ва симои ин кишвар хабар додааст.

Меҳдӣ Сафарӣ ҳамчунин, аз чанд лоиҳа, ки маблағи умумиашон 350 миллион долларро ташкил медиҳад, иттилоъ дода, изҳори боварӣ кардаст, ки дар сурати амалӣ шудан он боиси рушди бесобиқаи нишондодҳои додуситади миёни ду кишвар мешавад.

- Дар ду моҳи ахир ҳаҷми содирот ба Тоҷикистон аз 60 то ба 180 миллион доллар афзоиш ёфтааст. Ба Тоҷикистон асосан мошинолот содирот шуд,- гуфтааст муовини вазири хорҷии Эрон.

Сафарӣ, ҳамчунин, зикр кардааст, ки дар ин муддат онҳо талош карданд, ки даҳлезҳои иқтисодии кишварҳои ҳамсоя ва шарик ба Бандар Аббоси ва бандари Чобаҳор муттасил шавад ва ба ин манзур бо вазорати нақлиёт ва тиҷорати ин кишварҳо комиссияҳои муштарак ташкил шудааст.

Дар Вазорати рушди иқтисод ва савдои Тоҷикистон дар робита ба афзоиши додугуруифт миёни ду кишвар дар ду моҳи охир баи “Азия-Плюс” гуфтанд, ки давоми рӯз ин арқому доду ситад бо Эронро пешниҳод хоҳанд кард.

Дар ҳамин ҳол, ба иттилои Оҷонсии омори Тоҷикистон ҳаҷми гардиши савдои хориҷии Тоҷикистон бо Эрон дар 10 моҳи соли равон (январ-октябр) наздики 75 млн доллари амрикоир ташкил додааст. Ин нисбат ба ҳамин давраи соли 2020 1,7 баробар зиёд мебошад. Ҳамин тариқ, дар ин давра аз Тоҷикистон ба Эрон ба маблағи беш аз 15 млн доллари ИМА молу маҳсулот содир шуда,  қариб 60 млн доллари аз Эрон ба Тоҷикистон молу маҳсулот ворид шудааст.

Эрон дар баробари як кишвари ҳамзабону ҳамфарҳанг бо Тоҷикистон, ҳамчунин яке аз умдатарин шарикони иқтисодии Тоҷикистон ба шумор меравад. Яке аз тарҳҳои бузургтарини Эрон дар Тоҷикистон ин нақби “Истиқлол” аст, ки  маркази Тоҷикистонро бо шимоли он мепайвандад, Эрон онро бо харҷи бештар аз 60 миллион доллар ва дар муддати 3 сол сохт. Онро соли 2006 бо ҳузури Маҳмуди Аҳмадинажод, раисҷумҳури вақти Эрон ва Эмомалӣ Раҳмон, раиси ҷумҳури Тоҷикистон ба баҳрабардорӣ супурданд.

Вале дар соли 2013  дар пайи зиндонӣ шудани Бобаки Занҷонӣ, сармоягузори эронӣ ва манъи фаъолияти ҳизби дар Тоҷикистон мамнӯи наҳзати ислом, ки Тоҷикистон Эронро пуштибонӣ он ном бурд, муносибати ду кишвар сард шуд ва мизони додугирифт миёни онҳо низ якбора коҳиш ёфт.

Агар дар соли 2013 ду кишвар ба маблағи беш аз 292 миллион доллар додугирифт карда бошанд, соли гузашта ин рақам баробари 57,7 миллион доллари амрикоӣ шуд. Аз ин маблағ 9,4 млн ба содирот ва 48,4 млн доллар ба воридоти мол аз Эрон рост меояд.

Ҳамин тариқ, шурӯъ аз соли 2020 гармшавии ғайриинтизори равобити Тоҷикистону Эрон ба чашм хӯрд ва то ин дам аллакай вохӯриҳои сатҳи баланд низ баргузор гардид. Аз ҷумла, зимни сафари президенти Эрон Сайид Иброҳим Раисӣ ба Душанбе 18 сентябр байни Тоҷикистону Эрон 8 созишномаи ҳамкорӣ имзо шуд.

Ҳамчунин, барои афзоиши савдои дуҷониба байни давлатҳо пешниҳод шуда буд, ки Барномаи дарозмуҳлати ҳамкории тиҷоративу иқтисодӣ байни Тоҷикистону Эрон таҳия ва қабул шуда, Палатаи муштараки савдо ва саноат, инчунин Шӯрои муштарак оид ба сармоягузорӣ таъсис дода шавад.

Дар Telegram, Facebook, Instagram, OK ва ВК бо мо бимонед.

Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.