Дар доираи сафари хидматии намояндагони Бонки миллии Тоҷикистон (БМТ) таҳти сарварии Муовини якуми Раиси БМТ Ҷамолиддин Нуралиев ба шаҳри Марини Швейтсария миёни БМТ ва ширкати “Металор”-и ин кишвар Шартномаи ҳамкории дуҷониба ба имзо расонида шуд.

Акс аз сомонаи БМТ

Бино ба маълумоти дафтари матбуоти БМТ, ширкати “Металор”-и Швейтсария соли 1852 ташкил ёфта, яке аз бонуфузтарин ширкатҳо дар соҳаи коркард ва тасфияи филизоти қиматбаҳо ба ҳисоб меравад. Ширкати мазкур дар саросари ҷаҳон фаъолона иштирок намуда, дар 17 кишвар намояндагиҳои худро кушодааст. Ба шабакаи байналмилалии муштариён пайваст буда, маҳсулоти ин ширкат дар ИМА (Лос Анҷелес ва Лима), Аврупо (Лион) ва Осиё (Ҳонконг) ба муомилот бароварда мешавад.

Гуфта мешавад, теъдоди кормандони умумии ширкати мазкур 1650 нафарро ташкил медиҳад. Маҳсулоти ин ширкат дар саноати электронӣ, мошинасозӣ ва соҳаи ороишӣ истифода мешавад. Дар корхонаи мазкур маҳсулоти хом ва нимтайёр, ба монанди тилло, платинум, палладий ва нуқра коркард карда мешаванд.

Қобили зикр аст, ки истихроҷи филизоти қиматбаҳо, бахусус тилло дар Тоҷикистон ҳамасола асосан бо кумаки сармоягузорони Чин дар ҳоли афзоиш аст.

Соли 2016 корхонаҳои истеҳсоли тиллои Тоҷикистон беш аз панҷ тонна тилло истеҳсол карданд, ки дар муқоиса бо соли 2015 ба миқдори 500 кило бештар аст. Ҳаҷми истеҳсоли нукра дар соли гузашта бошад, 3,2 тоннаро ташкил дод, ки нисбати нишондиҳандаи соли 2015 ба миқдори 200 кило бештар мебошад.

Харидорони асосии тиллои дар Тоҷикистон истихроҷшуда Бонки миллии ҷумҳурӣ ва Вазорати молияи кишвар мебошанд. Нуқра қариб пурра ба кишварҳои аврупоӣ содирот мешавад.

Бино ба маълумоти Бонки миллӣ, соли 2016 дар ҳаҷми умумии маҳсулоти содиротии Тоҷикистон ҳиссаи тилло 14%-ро ташкил додааст.

Швейтсария яке аз шарикони асосии тиҷоратии Тоҷикистон маҳсуб ёфта, беш аз 90%-и сохтори муомилоти моли ин кишварҳо аз содироти маҳсулоти Тоҷикистон ба ин кишвар рост меояд.