Ҳаҷми истеҳсоли тилло нимсолаи аввали соли равон дар Тоҷикистон каме коҳиш ёфта, истеҳсоли нуқра афзуд.

Тавре ба «Азия-Плюс» аз Вазорати саноат ва технологияҳои нави ҷумҳурӣ дар ин робита иттилоъ доданд, давоми моҳҳои январ-июни соли равон дар Тоҷикистон наздики 2,5 тонна тилло истеҳсол шудааст, ки нисбат ба ҳамин давраи соли гузашта 37 кило камтар мебошад.

Коҳиши ҳаҷми истеҳсоли тиллоро дар Вазорат ба муваққатан аз фаъолият бозмондани чанде аз корхонаҳои ин соҳа, аз ҷумла конҳои «Покрут», КМ «Зарафшон (муддати қариб 1 моҳ) ва дастрас нашудани реагенти кимиёвӣ - сианид нисбат доданд.

«Нисолаи аввали соли ҷорӣ аз 12 корхонаи истихроҷи тиллои ҷумҳурӣ ҳамагӣ 7-тоаш мунтазам фаъолият доштанд», - гуфтанд дар Вазорат.

Зимнан зикр гардид, ки тӯли шаш моҳи соли 2018 дар Тоҷикистон ҳудуди 3,1 тонна нуқра истеҳсол шудааст, ки дар муқоиса бо нишондиҳандаи ҳамин давраи соли гузашта беш аз 1 тонна зиёдтар аст.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.