Намояндагони ҶДММ «Парки саноатӣ-кимиёвии Сумгаит»-и Вазорати иқтисоди Озарбойҷон бо вакилони палатаи поёнии парлумони Тоҷикистон доир ба таҳияи қонунгузорӣ ва таъсиси паркҳои техникӣ табодули таҷриба намуданд, хабар медиҳад котиботи Вазорати саноат ва технологияҳои нави ҶТ.

Ба иттилои манбаъ, мутахассисони озарбойҷонӣ аз ҷониби Вазорати саноат баҳри роҳандозии ҳамкорӣ оид ба таъсиси паркҳои техникӣ ба Тоҷикистон даъват шудаанд.

Гуфта мешавад, вохӯрии мутахассисони парки Сумгаит бо намояндагони Вазорати саноат ва вакилони парлумон рӯзи 5 апрел доир гардид.

Мутахассисони озарбойҷонӣ ҳамчунин бо раҳбарияти Кумитаи давлатии сармоягузорӣ ва идораи амволи давлатии ҷумҳурӣ дидору гуфтушунид карда, зимни вохӯрӣ масоли вобаста ба имтиёзҳои мавҷуда барои корхонаҳои саноатӣ, хусусан дар паркҳои саноатӣ ва сармоягузорони хориҷию ватанӣ баррасӣ шуд.

Қаблан Вазорати саноат дар бораи нияти таъсиси парки технологияҳои иттилоотӣ (IT Park) дар Тоҷикистон бо истифода аз таҷрибаи пешрафтаи кишварҳои хориҷӣ, аз ҷумла Ӯзбекистону Гурҷистон, Молдова, Украина ва Беларус хабар дода буд.

Қобили зикр аст, ки Тоҷикистон ягона кишвар дар Осиёи Марказӣ мебошад, ки то ҳол чунин паркҳо надорад. Нахустин IT Park-ҳо дар Қазоқистон ҳанӯз соли 2003, дар Қирғизистон - соли 2013, Туркманистон - соли 2018 ва Ӯзбекистон - соли 2019 таъсис дода шудаанд.

Бархе аз мутахассисон мегӯянд,  пештар Тоҷикистон аз лиҳози истифодаи технологияҳои нав 3-4 сол ва акнун - даҳсолаҳо қафо мондааст.

Дар гузориш оид ба технология ва инноватсияҳо (Technology and Innovation Report 2021), ки 25 феврали ҳамин сол аз ҷониби Конфронси СММ оид ба тиҷорат ва рушд нашр шуд, Тоҷикистон ба сафи 15 кишвари бештар омоданабудаи ҷаҳон ба технологияҳои нав шомил гардидааст.

ҶДММ «Парки саноатӣ-кимиёвии Сумгаит»-и Вазорати иқтисоди Озарбойҷон моҳи декабри соли 2011 таъсис ёфта, моликияти ҷамъиятӣ мебошад. Айни замон дар қаларави ин парк ҳудуди 30 корхона фаъолият мекунад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.